Ministru Administrasaun Estatál, Miguel de Carvalho. Imajen Tatoli/Egas Cristovão

DILI, 29 setembru 2020 (TATOLI)-Ministériu Administrasaun Estatál (MAE) liuhosi Programa Nasionál Dezenvolve Suku (PNDS) planeia harii uma ba kbiit laek hamutuk 2.544 ho totál orsamentu milliaun $50, ne’ebé prevee ona iha proposta Orsamentu Jerál Estadu (OJE) 2021, maibé hein desizaun hosi Komité Revizaun Orsamentu Polítiku (KROP).

“Ami foin propoin ba KROP maibé sei hein desizaun, bainhira iha ona proposta finál no haruka ba Parlamentu Nasionál maka ha’u hanoin foin loos, espera bele konsidera,” dehan Ministru Administrasaun Estatál, Miguel de Carvalho, hafoin partisipa iha diskusaun KROP, iha edifísiu Ministériu Finansa (MF), tersa ne’e.

Notísia Relevante: PNDS husu adisionál millaun $50 harii uma ba kbiit laek

Tuir planu, unidade ida ho medida metru kuadradu 40 ho kuartu tolu, haris fatin no koziña.

“Dezeñu preparadu hela no ekipa tékniku PNDS prepara ba implementasaun,”  nia tenik.

Tuir governante ne’e, manuál harii uma kbiit laek MAE sei koordena hamutuk ho Ministériu Solidaridade Sosiál no Inkluzaun (MSSI) Sekretaria Estadu Protesaun Sivíl (SEPS) atu verifika filafali dadus.

“Ita identifika benefisiáriu ba uma pur volta 2.500-resin. Ami propoin ona ba kada uma pur volta entre $14.000 to’o 17.000, depende medida,” Ministru informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here