DILI, 29 setembru 2020 (TATOLI)-Governu liuhosi Vise-Ministru Interiór, António Armindo, Vise-Ministu Obra Públika (MOP), Nicolau Lino Freitas, Sektretáriu Estadu Formasaun Profisionál no Empregu (SEFOPE), Alarico de Rosário, inklui Komadante Jerál Polísia Nasionál Timor-Leste (PNTL), Komisáriu Faustino da Costa, inaugura uma guarda kuartél jerál.
Iha seremónia inaugurasaun ne’e, Vise-Ministru António Armindo, husu ba membru PNTL sira atu utiliza fatin ne’e ho responsabilidade.
“Ha’u husu membru uza ho kuidadu fatin ne’e no responsabilidade, atu nune’e bele hala’o serbisu tau matan no fó seguransa ba ita-nia komunidade,” dehan governante iha Kuartél Jerál PNTL, Caicoli, tersa ne’e.
Biban ne’e nia fó apresiasaun no agradese ba Sentru Formasaun Dom Bosco tamba ho abilidade no esperiénsia ne’ebé iha bele halo obra di’ak no sai parseria ho SEFOPE.
Membru ezekutivu ne’e husu ba SEFOPE atu kontinua fó nafatin formasaun ba joven sira atubele hola parte no sai na’in ba prosesu dezenvolvimentu nasaun nian liuhosi esperiénsia no abilidade profisionál.
Iha fatin hanesan, Sekretáriu Estadu Alarico de Rosário, husu ba públiku atu valoriza abilidade joventude timor-oan.
“Ami hakarak promove juventude nia esperiénsia no buat ne’ebé sira halo, no atu hatudu ba públiku katak ita hotu presiza valoriza jerasaun foun sira nia abilidade no esperiénsia,” nia dehan.
Sekretáriu Estadu ne’e apela ba entidade hotu karik iha serbisu ruma bele envolve ema ne’ebé SEFOPE prodús ona iha área oin-oin.
“Ha’u husu ba instituisaun hotu, labele lori ema hosi li’ur mai serbisu iha ita-nia rai maibé ita mós bele envolve ita-nia ema lokál ne’ebé maka SEFOPE prodús ona hanesan agora daudaun PNTL hatudu ona,” governante ne’e fó hanoin.
Komisáriu Faustino da Costa, lori PNTL nia naran agradese SEFOPE tanba bele konstrui fatin ba ba membru ne’ebé sei halo knaar durante oras 24 nia-laran iha fatin refere.
“Ba membru sira, tenke utiliza fatin ne’e ho responsabilidade no garante katak uma ne’e ho kondisaun di’ak,” nia tenik.
Postu seguransa ne’e konstrui hosi traballadór programa on the job training (OJL) hosi Sentru Formasaun Profisionál Dom Bosco, Comoro hamutuk ema na’in-16, kompostu hosi mane 15 no feto ida.
Konstrusaun ne’e hala’o durante fulan-neen no edifísiu ninia naruk metru 11 no luan metru haat, ne’ebé kompostu hosi sala rua, sela rua, no haris fatin ida.
Orsamnetu ne’ebé SEFOPE apoiu ba PNTL halo kontrusaun ne’e hamutuk $60.000.
Jornalista: Natalino Costa
Editora: Julia Chatarina