Primeiru-Ministru, Taur Matan Ruak, prezide reuniaun rezultadu KROP ba proposta OJE 2021 iha salaun Ministériu Finansa, Aitarak-laran, tersa (29/09). Imajen Tatoli/Egas Cristovão

DILI, 29 setembru 2020 (TATOLI)-Komité Revizaun Orsamentu Polítiku (KROP) finaliza ona analiza ba alokasaun estratéjika rekursu submisaun orsamentál atubele atinje komprímisiu no objetivu sira.

KROP ba proposta Orsamentu Jerál Estadu (OJE) 2021 realiza durante loron-neen, hahú hosi loron 21 to’o 28 (pauza loron-rua).

Iha kuarta (30/09) MF sei fó sai rezultadu finál ba revizaun orsamentu tinan fiskál 2021.

Tuir nota ne’ebé Agência Tatoli asesu, Ministériu Finansa (MF) atualiza hela proposta orsamentu finál, hafoin sei lori ba Konsellu Ministru hodi halo apresiasaun no sei submete iha Parlamentu Nasionál (PN) iha loron 15 outubru 2020, tuir lei jestaun orsamentál no finanseira ne’ebé estabelese kalendáriu submisaun.

Prioridade ba orsamentu tinan oin maka atu rekupera no reforsa dezenvolvimentu nasionál, bazeia ba programa Governu no Planu Estratéjiku Dezenvolvimentu Nasionál, ho objetivu atu kria dezenvolvimentu sustentável, dezempeñu polítika fiskál, impaktu COVID-19 no planu rekuperasaun ekonómika hodi define envelope fiskál ba tinan 2021 ne’ebé adekuadu ba nesesidade reál nasaun nian.

Sesaun KROP prezide hosi Primeiru Ministru, hamutuk ho Vise Primeiru-Ministru na’in-rua, Ministru Koordenadór Asuntu Ekonómiku, Ministru Finansa, no Sekretaria Estadu Igualdade no Inkluzaun ne’ebé sai hanesan observadora.

Diskusaun ne’e fahe ba sub-komité setoriál haat hanesan sub-komité setór institusionál prezide hosi Primeiru-Ministru, sub-komité setór sosiál prezide hosi Vise Primeiru-Ministru no Ministra Solidariedade Sosiál no Inkluzaun, sub-komité setór infraestrutura, preizide hosi Vise Primeiru-Ministru no Ministru Planu no Ordenamentu, no sub-komité setór ekonómiku prezide hosi Ministru Koordenadór Asuntu Ekonómiku.

Proposta OJE 2021 hamutuk biliaun $1,6, aloka ba kategoria saláriu no vensimentu millaun $216,2, sasán no servisu millaun $451,1,  tranférensia públika millaun $480,7, kapitál dezenvolvimentu millaun $235,8 inklui kapitál menór millaun $6.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here