Vise Ministru Interiór, António Armindo. Imajen Tatoli/Egas Cristovão

DILI, 29 setembru 2020 (TATOLI)- Vise Ministru Interiór, António Armindo, hein hela relatóriu hosi Komandu Jerál Polísia Nasionál Timor-Leste (PNTL) hodi fó demisaun ba membru PNTL sira ne’ebé komete iha irregularidade.

Notísia Relevante : Komandu PNTL diskute prosesu demisaun ba membru na’in-lima

Vise Ministru António Armindo rona ona informasaun hosi Komandu Jerál PNTL kona-ba enkontru Komandu nian hodi diskute prosesu fó demisaun ba membru sira ne’e, maibé seidauk simu relatóriu detalladu.

“Agora daudaun ita rona no hatene ona informasaun ne’e, mais relatóriu hosi komandu seidauk haruka mai. Bainhira relatóriu haruka mai, ami sei haree prosesu sira-ne’e,” informa Vise Ministru Interiór, António Armindo, ba jornalista, ohin, iha Komandu Jerál PNTL, Caicoli, Dili.

Nia dehan, lei disiplinár PNTL nian ne’e, Konsellu Ministru aprova ona, tanba ne’e husu ba membru PNTL sira kontinua servisu profisionál hodi labele komete iha irregularidade no kazu krime ruma.

Antes ne’e, Konsellu Superiór PNTL halo reuniaun koordenasaun hodi fahe hanoin kona-ba proposta demisaun ba membru PNTL na’in lima ne’ebé komete irregularidade iha sira-nia knaar loro-loron.

Kazu Lamberto Boavida mós hein relatóriu  

Komandante Jerál PNTL, Komísariu Faustino da Costa. Imajen Tatoli/Egas Cristovão

Hosi sorin seluk, Komandante Jerál PNTL, Komisáriu Faustino da Costa, deklara kazu dezentendimentu entre Ajente Polísia, Laberto Boavida ho Komandante PNTL Baucau, Superintendente Xefe, Armando Monteiro nian, daudaun ne’e, sei hein hela relatóriu investigasaun hosi Departamentu Justisa PNTL nian.

“To’o agora ekipa konjunta seidauk aprezenta relatóriu, tanba sitasaun agora iha Baucau la’o di’ak, tanba membru sira hala’o hela servisu ho di’ak,” nia hateten.

Notísia Relevante : Ajente Lamberto Boavida: “Ha’u la ameasa Komandante Armando ho kilat”

Komisáriu Faustino dehan, dezentendimentu ne’ebé mosu entre Ajente Lamberto Boavida no komandante Armando Monteiro, nia parte seidauk bele fó denunsia se maka loos, no se maka sala. Tanba presiza hein relatóriu investigasaun.

Komandante ne’e alerta fatin ba membru PNTL iha Baucau tomak hala’o servisu hodi garante paz ba povu no halo servisu kumpre nafatin regra no disiplina.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here