Diretór Sentru Formasaun Jurídika no Judisiál (CFJJ - sigla Português), Antonino Gonçalves. Imajen/Dok.Tatoli

DILI, 29 setembru 2020 (TATOLI)-Sentru Formasaun Jurídika no Judisiál (CFJJ-sigla portugés) sei loke vaga 25 ba Timor-oan ne’ebé lisensiadu iha area direitu hodi tuir kursu ba advogadu privadu.

Notísia Relevante : CFJJ Seidauk Rekruta Formandu 45 atu Sai Juíz no Defensór Públiku

“Planu formasaun vaga refere prevee  ona  iha proposta orsamentu Jerál Estadu OJE 2021,” informa diretór CFJJ, Antonino Gonçalves, ohin, ba Agência Tatoli via telefone iha Dili.

Nia informa tan, hafoin orsamentu aprova, CFJJ sei hahú  loke vaga refere ba públiku hodi bele partisipa no hatama aplikasaun.

Polítika Ministériu Justisa, liuhosi Sentru Formasaun Jurídika no Judisiál hodi fó formasaun refere, Antonino Gonçalves hateten, bele aumenta rekursu umanu advogadu hodi bele fó asisténsia  di’ak liután ba ema ne’ebé hasoru justisa no parte ida kontribui ba dezenvolvimentu  setór justisa nian.

“Formasaun ne’e   Sentru Formasaun Jurídika no Judisiál mak fó  ba ema lisensiadu direitu hodi bele kandidatu sai  advogadu privadu,” diretór  CFJJ, Antonino Gonçalves hateten.

Formasaun  ne’e sei la’o durante tinan-rua; teoria  tinan-ida no prátika tinan-ida, hafoin ne’e kandidatu sira sei tuir fila-fali teste ikus kuandu pasa mak CFJJ sei sertifika hodi sai advogadu loloos.

Tuir dadus hosi Sentru Formasaun Jurídika no Judisiáriu daudaun ne’e rejista advogadu privadu iha Timor-Leste hamutuk na’in-150-resin no hirak ne’e tuir ona formasaun no hetan sertifikasaun hosi  CFJJ.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here