Enkontru Konsellu Estadu ne’ebé prezide hosi Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, Imajen TATOLI/Dokumentasaun.

DILI, 29 setembru 2020 (TATOLI)—Prezidente Repúblika, Francisco Guterres ‘Lú Olo’,  aban, sei reune ho Konsellu Estadu (KE) no Konsellu Superior Defeza no Seguransa (KSDS) hodi rona hanoin sira kona-ba pedidu hosi Governu kona-ba renovasaun Estadu Emerjénsia (EE) ba periódu loron tolu nulu ba oin. Periódu Estadu Emerjénsia ba dalimak nian, hahú hosi 5 setembru, sei termina iha 4 outubru 2020.

Haree ba pandemia COVID-19 ne’ebé seidauk hatene bainhira mak atu hotu no númeru kazu pozitivu COVID-19 iha país viziñu sira, Australia no Indonézia, liuliu ho provinsia Nusa Tenggara Timur (NTT) ne’ebé fahe nia fronteira terrestres hamutuk ho Timor-Leste, moras coronavirus aumenta.

Atu evita  risku importasaun moras coronavirus hada’et mai territóriu nasionál no aplika medida restritu ba prevensaun no kontrolu ninian, Konsellu Ministru aprova renovasaun Estadu Emerjénsia no haruka pedidu mai Prezidente Repúblika atu deside.

Implementasaun estadu emerjénsia nu’udar medida prevensaun no kontrolu ba COVID-19 hodi hasees sidadaun hotu-hotu iha Timor-Leste hosi kalamidade públika.

Prezidente Repúblika uza nia poder konstitusionál tuir artigu 85,  alínea g, konvoka membru sira seluk hosi órgaun konsulta—Konsellu  Superior Defeza no Seguransa no Konsellu Estadu—atu rona ida-idak ninia hanoin kona-ba pedidu deklarasaun Estadu Emerjénsia hosi Governu.

 Reuniaun Konsellu Superior Defeza no Seguransa sei hahú aban, tuku 9 liu minutu 30 dadeersan no   Konsellu Estadu, sei hahú tuku 11.

Hafoin tetu opiniaun hosi  membru Konsellu Superior Defeza no Seguransa no Konsellu Estadu mak Prezidente Repúblika foin deside.  Karik Prezidente Repúblika deside katak presiza duni Deklarasaun Estadu Emerjénsia, sei  husu autorizasaun hosi Parlamentu Nasionál, liuhosi  mensájen ida. Karik Parlamentu Nasional aprova pedidu ne’e, Prezidente Repúblika sei deklara Estadu Emerjénsia liuhusi Dekretu Prezidensiál.

Konvite hosi Prezidente Repúblika hato’o ona ba membru hotu-hotu Konsellu rua ne’e nian.

Membru  sira-ne’ebé halo parte Konsellu Superior Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun  Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano.

Halo parte mós iha Konsellu ne’e,  membru sira nomeadu  hosi Parlamentu Nasionál mak Adérito Hugo da Costa, David Dias Ximenes, Abel Pires da Silva. Membru sira nomeadu hosi Prezidente Repúblika mak José Manuel Fernandes ‘Nakfilak’ no Cristina da Silva.

Membru sira ne’ebé halo parte Konsellu Estadu mak Prezidente Repúblika Francisco Guterres Lú Olo, Eis-Prezidente Repúblika Xanana Gusmão, Eis-Prezidente José Ramos Horta, Eis-Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes. 

Halo parte mós Konsellu ne’e membru sira nomeadu hosi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Hosi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.

Komunikadu Imprensa

HAKEREK NO HATÁN

Please enter your comment!
Please enter your name here