Diretór Ezekutivu Servisu Autónomu Medikamentus Ekipamentus Saúde (SAMES), Santana Martins.Imajen/TATOLI:Felicidade Ximenes

DILI, 29 setembru 2020 (TATOLI)-Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, relata daudaun ne’e nia parte uza ona Dotasaun Orsamentu Temporariu (DOT) hamutuk millaun $ 3.7 hodi sosa medikamentu no ekipamentu saúde.

Tuir planu iha tinan ne’e SAMES sosa ai-moruk no ekipamentu saúde hamutuk millaun $ 5.5, maibé agora uza ona DOT millaun $ 3.7 no falta millaun $ 1.8.

Notísia Relevante :Estoke ai-moruk iha SAMES komesa menus

SAMES hetan tetu fiskál ba 2020 nian hamutuk millaun $ 6.998.979, maibé husi montante ne’e sei rekupera filafali DOT ne’ebé gasta ona durante ne’e hafoin orsamentu ne’e hetan aprovasaun iha Parlamentu Nasionál.

”No ita iha tan adisionál millaun $ 1.8 para bele halo ezekusaun entaun aleinde orsamentu ida ne’e ita mós utiliza ba selu salariu funsionáriu no manutensaun karreta,  kombustivel, inklui manutensaun edifísiu,” nia dehan ba Tatoli, iha ninia servisu fatin Kampung-Alor Dili, tersa ne’e.

Husi totál millaun $ 5.5 ne’ebé aloka hodi sosa medikamentu konsumuveis, reazente, hemodialisa, oksijéniu, inklu ekipamentu vásina.

Ai-moruk pursentu 77 ne’ebé  maka SAMES sosa oras ne’e rai ona iha  armazén SAMES nian hanesan parcetamol, amoxilin, ampicilin.

”Ai-moruk sira ne’e ita sosa husi nasaun Austrália, Índia, Xina,  Olanda,  Dinamarka no Portugal,” nia esplika.

Ho estoke ne’ebé iha maka  SAMES kompleta  ona item ai-moruk hamutuk pursentu 85.5 no estoke mamuk iha pursentu 14.

”Ida 14 % mamuk ne’e iha 50 itál item maibé ida ne’e ha’u bele temi de’it katak ai-moruk vitál 6% mak laiha depois iha 23 % ai-moruk esensiál mamuk mak hanesan Amoxilin/Clavulanate oral125mg/31.25mg/5ml Bot100ml, Artesunate 50mg tabs, Captopril 25mg tabs, no Catropril 50mg tabs no seluk tan,” nia hateten.

Entertantu, Kompãna South Austrália, Boucher and Muir Austrália, Quilaban husi Portugal, Foundation Holand no seluk tan maka sosa medikamentu no ekipamentu hirak ne’e.

Enkuantu, kona-ba salariu funsionáriu nian, nia dehan SAMES  ezekuta ona 89% husi osan ne’ebé maka iha tanba ne’e espera katak fulan tolu mai sei ezekuta to’o 100 %.

Aleinde ne’e, aloka  mós orsamentu rihun 38 hodi halo distribuisaun ba ekipamentu no medikamentu saúde, rihun $ 289 selu eletrisidade no kobre mós dividas balun iha 2019 nian.

Notísia Relevante :SAMES iha Stock Out Kona-ba Medikamentu Sa’e Ona  23 %

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here