Jornalista sira bainhira halo kobertura iha ámbitu luta kontra COVID-19. Imajen Tatoli/Egas Cristovão

DILI, 28 setembru 2020 (TATOLI)-Sekretáriu Jerál Timor-Leste Press Union (TLPU), Horacio Babo, husu ba entidade hotu atu fasilita informasaun ba jornalista sira nune’e bele hato’o informasaun ba públiku ho di’ak.

“Governu, sosiedade sivíl ka sé de’it labele taka informasaun ba jornalista atu sira hetan informasaun klaru ho dadus, liuliu hosi institusaun Estadu sira. Ita hotu iha devér tomak fó informasaun  tanba sira buka informasaun la’ós ba sira-nia an maibé atu hatutan ba públiku,” dehan Sekretáriu Jerál TLPU ba Agência Tatoli, iha ninia knaar fatin, segunda ne’e.

Nia hato’o lia hirak ne’e relasiona ho loron mundiál asesu informasaun universál, ne’ebé kada tinan sempre selebra iha 28 setembru, hahú tinan 2015.

Tanba ne’e, membru ezekutivu asosiasaun jornalista ne’e husu ba entidade hotu atu konsidera katak públiku iha direitu atu asesu informasaun.

“Timor-Leste Press Union konsidera informasaun balun maka susar atu kolega jornalista sira asesu, liuliu institusaun Estadu balun sei taka-an,” nia subliña.

Iha sorin seluk, Vise Prezidente Asosiasaun Jornalista Timor-Leste (AJTL), Aniceito do Reis, apela ba Governu atu fasilita informasaun no labele impede jornalista sira asesu informasaun.

“Dalaruma jornalista sira iha difikuldade atu asesu ba informasaun ne’ebé sensitivu,” nia dehan.

Nia mós nota, bainhira profisionál komunikasaun sosiál sira buka kompleta notísia, dalaruma hetan impedementu ka rekuza fó komentáriu no dadus.

“AJTL hakarak apela ba entidade Estadu sira atu fasilita dokumentu nesesáriu sira ne’ebé maka jornalista sira buka, atu nune’e bele kontribui ba papél jornalista ne’ebé maka kontrola sosiál no kontribui ba administrasaun ne’ebé transparante,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here