COVID-19

DILI, 28 setembru 2020 (TATOLI)- Komandu Polísia Munisípiu Dili ho ekipa Ministériu Saúde, ohin, halo evakuasaun emerjénsia ba Indonéziu (WNI/Warga Negara Indonesia) ida husi Otél Faról, Dili ba Sentru Izolamentu Vera Krús, tanba deskonfia iha sintoma COVID-19.

Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

Segundu Komandante PNTL Munisípiu Dili, Superintendente Euclides Belo dehan, Indonéziu ne’e foin mai husi nia-rain no durante ne’e kumpre hela regra Ministériu Saúde hodi hela provizóriu iha Otél Faról, Dili, maibé tanba ohin deskonfia nia sofre moras no ekipa médiku COVID-19 halo kedas teste no evakuasaun.

“Ohin ita nia polísia hamutuk ho ekipa médiku halo evakuasaun ba Indonéziu mane ida iha Otél Faról ne’ebé deskonfia sintoma COVID-19, tanba ne’e ohin ita halo kedas evakuasaun mai halo tratamentu saúde iha Sentru Izolamentu Vera Krús, hodi submete ba teste COVID-19,” informa Segundu Komandante PNTL Dili, Euclides Belo ba jornalista, iha Komandu PNTL, Caicoli, Dili.

Prosesu evakuasaun ne’e, PNTL akompaña de’it hodi fó seguransa, tanba ekipa médiku Ministériu Saúde sei halo teste kle’an liután ba pasiente ne’e hodi fó sai nia rezultadu ba sosiedade sira atu kontinua kuidadu no halo prevensaun.

Daudaun ne’e, ekipa médiku sei halo mós teste ba Timor-oan sira seluk ne’ebé hela hamutuk ho  Indonéziu iha Otél Faról  hodi teste nafatin sira nia saúde.

Euclides hatutan, sidadaun sira ne’ebé tama ilegál hosi fronteira terrestre balun sei kumpre hela regra hela Kuarentena Otél Colmera, Faról no fatin seluk tan no hetan seguransa másimu hosi PNTL.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here