Sekretária Rejionál Adjuntu Prezidente Autoridade RAEOA ba reforsu institusionál, Leonia Monteiro. Imajen Tatoli/Egas Cristovão

DILI, 28 setembru 2020 (TATOLI)-Iha diskusaun Komité Revizaun Orsamentu Polítika (KROP) ba proposta Orsamentu Jerál Estadu (OJE) 2021, Rejiaun Administrativa Espesiál Oé-cusse Ambeno (RAEOA) husu adisionál millaun $30, hosi tetu orijinál hamutuk millaun $127.

Sekretária Rejionál Adjuntu Prezidente Autoridade RAEOA ba reforsu institusionál, Leonia Monteiro, informa orsamentu ne’ebé alokadu ba rejiaun espesiál ne’e hodi halo jestaun ba projetu iha Oé-cusse.

“Osan adisionál ami husu millaun $30 atu finansia despeza korrente, hanesan selu saláriu no vensimentu, bens no servisu, kapitál menor no despeza polítika. Atu nune’e despeza korrente la’o nafatin tanba orsamentu aprovadu iha Konsellu Ministru hanesan orsamentu própriu RAEOA ninian, ne’ebé millaun $97 mantein ba kapitál dezenvolvimentu hanesan kontinua halo pagamentu ba projetu ne’ebé la’o daudaun,” hateten Sekretária Rejionál ne’e hafoin ramata reuniaun KROP iha MF, Aitarak-laran, segunda ne’e.

Orsamentu ba RAEOA fahe ba kategoria saláriu no vensimentu millaun $8 hodi selu funsionáriu permanente 226 no kontratadu 800, ho totál hamutuk 1.026.

Alokasaun ba kategoria bens no servisu millaun $15, atu halo manutensaun ba sentrál elétrika, manutensaun ba aviaun Zona Ekonomia Espesiál Sosiál Merkadu, Timor-Leste (ZEESM-TL), manutensaun viatura Estadu, manutensaun edifísiu públiku, kombustível aviaun, kombustível ba sentrál eletrisidade, seguransa, no selu pesoál limpeza.

Kapitál Menor millaun $2-resin, atu sosa viatura tanki bee-moos, viatura operasionál haat, no viatura ba membru autoridade lima.

Enkuantu alokasaun iha transferénsia públika hamutuk millaun $2-resin, ne’ebé sei uza ba  merenda eskolár, subsídiu ba konsellu suku hamutuk 18 no selu verba balun ba Programa Nasaun Unida ba Dezenvolvimentu (PNUD) ne’ebé mak durante ne’e fó apoia ba RAEOA.

Projetu ne’ebé daudaun la’o hela maka estrada urbana no estrada ba Cintrana no Oé-silo, tama ona iha konkursu no levantamentu projetu ne’ebé hala’o desde 2018 to’o 2019.

Nune’e mós, projetu foun haat atu ezekuta iha 2020 no 2021, mak halo perfurasaun bee-moos ba komunidade no agora agora daudaun programa prioridade ne’ebé Oé-cusse atu implementa maka prevensaun ba pandemia COVID-19, ne’ebé maka atu estabelese fatin kuarentene iha fronteira (Sacato, Oé-silo, Pásabe, no Nitibe), tau ema sira tama hosi fronteira hodi labele ba to’o vila maibé hela de’it iha fronteira hodi kumpre kuarentene loron 14.

Prioridade seluk maka bee-moos ba komunidade, tanba dadaun Oé-cusse bee maran no komunidade labele hetan bee barak, entaun presiza sosa tanki bee hodi halo distribuisaun bee-moos ba komunidade no mós halo perfurasaun bee-matan iha fatin haat (Pante-Makasar, Oé-silo, Pásabe no Nítibe).

Programa ikus liu mak rekuperasaun ekonómiku, daudaun ne’e RAEOA serbisu hamutuk ho Ministériu Administrasaun Estatál (MAE) hodi halo levantamentu dadus família, koordena mós ho Ministériu Koordenadór Asuntu Ekonómiku (MKAE) atu halo levantamentu ba komersiante sira iha Oé-cusse.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here