sesaun plenaria iha Parlamento Nasional. Imajen Tatoli/Egas Cristovão

DILI, 28 setembru 2020 (TATOLI)—Parlamentu Nasionál ne’ebé xefia hosi Deputadu Aniceto Longuinhos Guterres Lopes sei promove partisipasaun sosiedade sivíl iha atividade parlamentár no lejizlativa nune’e atividade hotu bele la’o ho transparénsia iha desizaun polítika.

Parlamentu Nasionál hanesan órgaun soberania iha Repúblika Demokrátika Timor-Leste (RDTL), reprezentativu ba sidadaun hotu-hotu ho podér lejizlativa, fiskalizasaun no desizaun polítka bazeia ba Konstituisaun RDTL artigu 92.

Bazea livru 2 (Planu Asaun Anuál) ne’ebé define medida prinsipál sira hosi Parlamentu Nasionál ba 2020 mak ezerse efetivamente funsaun konstitusionál Parlamentu Nasionál, reforsa kapasidade interna parlamentu nian, sei hala’o ezekusaun ba funsaun fiskalizasaun asaun Governu nian no Administrasaun Públika.

Ba tinan 2020 ne’ebé hela de’it fulan outubru, novembru no dezembru kontinua implementa polítika jéneru iha Parlamentu Nasionál.

“Promove kultura abertura no transparénsia iha Parlamentu Nasionál, inklui partisipasaun sosiedade sivíl iha atividade parlamentár no lejizlativa, nune’e sai transparente liu iha prosesu desizaun polítika sira no hala’o fiskalizasaun ba asaun governativa,” refere dokumentu planu asaun anuál ne’ebé Agência TATOLI, segunda ne’e.

Bainbain Prezidente Parlamentu Nasionál, Aniceto Guterres, fó-sai katak sei hakbesik parlamentu ba povu tanba parlamentu reprezenta povu timorense tomak.

Medida prinsipál ikus liu mak reforsa governasaun di’ak, jestaun institusionál iha servisu sira Parlamentu Nasionál nian no reforsa kapasidade rekursu umanu.

Medida hirak ne’e integra ho orsamentu privadu Parlamentu Nasionál ho montante millaun $12,039.885 aprovadu. Orsamentu ne’e aprova tiha ona iha loron 27 jullu 2020 liubá. Rezultadu votasaun ho votu a-favór 54, kontra O no abstensaun 0.

Hosi montante orsamentu millaun $12.039.884 ne’ebé fahe ba saláriu no vensimentu millaun $5.556.507 (46,2%), bens no servisu millaun $5.124.540 (42,6%), kapitál menór rihun $96.919 (0,8%), kapitál dezenvolvimentu rihun $3.919 (0,03%) no transferénsia públika millaun $1.258.000 (10,5%).

Orsamentu millaun $12.039.884 ba Parlamentu Nasionál nian barak liu mak ezekuta ona liuhosi Dotasaun Temporáriu Orsamentál (DOT) hahú hosi janeiru to’o setembru no hela de’it fulan outubru, novembru no dezembru, tinan ida-ne’e.

Jornalista: Evaristo Soares Martins

Editor: Cancio Ximenes

HAKEREK NO HATÁN

Please enter your comment!
Please enter your name here