Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno. Imajen/Egas Cristovão

DILI, 28 setembru 2020 (TATOLI)-Ministra Negósiu Estranjeiru no Kooperasaun (MNEK), Adaljiza Magno, hateten MNEK halo hela diskusaun ba planu atu loke voo komersiál husi Malázia-Dili, fulan ida, dala ida.

“Ita iha ona pedidu atu loke voo komersiál maibé Governu koordena hela, atu liuhosi Malázia mai Dili karik fulan ida dala ida, iha ona proposta diskute hela se jadi sei liuhosi Malázia tanba Indonézia taka,” Adaljiza Magno, dehan asuntu ne’e ba jornalista sira iha edífisiu Ministériu Finansa, Aitarak-Laran Dili, segunda ne’e.

Notísia Relevante :Voo umanitária WFP dala-hitu husi Malázia tula pasajeiru na’in-57

Governu hili voo hosi Malázia mai Dili tanba sei seguru husi COVId-19 kompara ho nasaun Indonézia ne’ebé maka númeru aumenta kada loron.

“Bainhira loke ona mak ita-nia maluk sira hakarak ba konsulta iha liur bele ona, hanesan Singapura mós loke ona, voo la loke mais ita ba Malázia bele liuba Singapura,” nia hateten.

Nia relata aviaun Air Timor iha ona pedidu atu halo voo komersiál husi Dili-Malázia nune’e mós Malázia-Dili.

“Pedidu husi Air Timor iha ona no iha tempu besik sei realiza voo komersiál ne’e,” nia dehan.

Notísia Relevante :Governu Sei Tetu Reativa Fali Voo Komersiál Internasionál

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here