Parlamento Nasional. Imajen Tatoli/Egas Cristovão.

DILI, 28 setembru 2020 (TATOLI)—Komisaun E (Infraestrutura) rekomenda ba Ministériu Transporte no Komunikasaun (MTK) atu hadi’a atendimentu iha Ró Berlin Nakroma nune’e pasajeiru sira hala’o viajen ho seguru no dignu.

Vise-Prezidente Komisaun E (Intraestrutura), Fabião de Oliveira, hateten komisaun halo ona aprovasaun ba relatóriu no paresér ho rezultadu votasaun a-favór 6 no abstensaun 3.

Iha semana kotuk, komisaun infraestrutura ne’e hala’o audiénsia Gabinete Primeiru-Ministru (GPM), Ministériu Transporte no Komunikasaun (MTKK), Ministériu Ordenamentu Territóriu no Ministériu Obra Públika (MOP).

Vise-Prezidente Komisaun E, Deputadu Fabião de Oliveira, hateten komisaun refere nia relatóriu finál ona orsida sei haruka ba Komisaun C (Finansa Públika) nune’e aprezenta ba plenária hodi kontinua hala’o diskusaun iha faze jeneralidade, espesialidade no finál globál.

“Primeiru mak Ministériu Transporte Komunikasaun haree liu ba portuáriu nian presiza hadi’a kondisaun pasajeiru hosi Dili ba Oé-Cusse no Dili ba Atauro nian, liuliu ba klinika movel no mós salva vida, presiza manutensaun adekuada para bele proteje pasajeiru sira-ne’ebé viajen ba Oé-Cusse no mós Dili-Atauro. Rekomendasaun ne’e ami aprezenta iha audiénsia,” dehan Vise-Prezidente Komisaun E, Deputadu Fabião de Oliveira, ba jornalista sira hafoin finaliza relatóriu no paresér iha Parlamentu Nasionál, segunda ne’e.

Iha parte seluk Vise-Prezidente Komisaun E hatutan, aleinde atendimentu sira-nia parte rekomenda mós ba Ministériu Transporte no Komunikasaun liuhosi transporte terrestre atu haree liu ba iha xapa-matríkula sira, karta kondusaun ne’ebé durante ne’e ho de’it provizóriu.

“Governu hatama osan iha kapitál minór para  atu halo xapa-matríkula orijinál ba ita-nia kliente sira durante  ne’e. Ita hatene muito bem katak durante ita iha dívida hela ba ita-nia kliente sira, liuliu kona-ba xapa-matríkula no karta kondusaun ne’ebé provizóriu de’it ne’e,” nia dehan.

Vise-Prezidente Komisaun E husu governu tenke konsidera situasaun hirak hodi fó solsaun ba preokupasaun sira-ne’e tanba orsamentu tinan fiskál 2020 hela de’it fulan outubru, novembru no dezembru. Deputadu Fabião de Oliveira fó hanoin ba MTK bele orsamenta iha Orsamentu Jerál Estadu (OJE) 2021.

“Ita haree fali ba Orsamentu Jerál Estadu 2021 nian liuliu ba fasilidade transporte terrestre nian halo ezame teste ba kliente sira ba karta kondusaun presiza fasilidade ne’ebé adekuada,” nia hateten.

Nune’e mós,, nia dehan, presiza haree eskritóriu ne’ebé adekuada nune’e rai dokumentu kliente sira ho di’ak no seguru. Tanba, propsta OJE 2020 hosi Ministériu Transporte no Komunikasaun (MTK) nian ho montante millaun $6,482,998.

Montante orsamentu millaun $6,482,998 ne’e komposta hosi saláriu no vesnimentu millaun $1,628,295, bens no servisu millaun $4,401,563, kapitál minór rihun $235,759 no kapitál dezenvolvimentu rihun $217,382.

Bazea livru 2 (Planu Asaun Anuál) deskreve kona-ba medida prinsipál ba tinan fiskál 2020 mak hanesan garante jestaun ba sistema transporte Terrestre, promove dezenvolvimentu no jestaun ba infraestrutura komunikasaun nian.

Medida prinsipál daruak mak asegura jestaun operasaun meteorolojia no jeofízika, garante funsionamentu normál no  sirkulasaun iha meiu transporte marítimu.

Medida prinsipál datoluk mak asegura prestasaun servisu postal sira, implementa polítika jéneru, promove governasaun di’ak no jestaun institusionál  ministériu refere.

Medida prinsipál ikus liu mak  fortalese instituisaun sira no eleva kapacidade rekursu umanu iha ministériu refere iha tinan fiskál 2020.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here