Ministra Negósiu Estranjeiru no Kooperasaun (MNEK), Adalgiza Albertina Xavier Reis Magno. Imajen/Egas Cristovão

DILI, 28 setembru 2020 (TATOLI)-Governu liuhosi Ministériu Negósiu Estranjeiru no Kooperasaun (MNEK), Ministériu Agrikultura no Peska (MAP), no Ministériu Ensinu Superiór Siénsia no Kultura (MESSK), daudaun ne’e buka hela opsaun atu lori fila bolseiru Timoroan 72 husi Israel mai Timor-Leste.

“Ami buka hela opsaun para sira bele fila, opsaun alternativu seidauk hetan maibé opsaun barak para sira bele mai depois ami sei fó sai,” Adaljiza hato’o asuntu ne’e ba jornalista sira iha edifísiu Ministériu Finansa Aitarak-Laran, Dili, segunda ne’e.

Notísia Relevante :Governu sei lori tan Timoroan iha rai-liur fila mai TL

Governante ne’e dehan imposivel atu aluga aviaun ketak tula bolseiru 72 iha Israel mai Timor-Leste tanba distánsia dook demais, maibé iha posivel sei tula hamutuk estudante Timoroan sira iha Filipina ne’ebé hakarak fila mai TL tanba sira-nia estudu ramata ona.

“Ami nafatin esforsu tanba aluga aviaun rute ne’e do’ok demais, karik ami haree para sira bele fila hamutuk ho estudante sira iha Filipina ou voo komersiál iha ona sira bele mai ho voo komersiál hanesan mai tia iha Malázia mak foin bele mai Timor-Leste,” nia hateten.

daudaun ne’e, bolseiru sira iha Israel iha kondisaun di’ak tanba Governu nasaun ne’ebá nafatin fó atensaun ba sira durante COVID-19.

“Sira iha ne’ebá kondisaun di’ak hela, eskola servisu manán osan, Governu Israel mós haree sira di’ak hela, sira mak hakarak mai Timor maibé sira laiha difikuldade,” Adaljiza hatutan.

Entertantu, antes ne’e, Ministra ne’e informa estudante Timoroan sira ne’e bá estuda iha Israel kona-ba setór teknolojia agriluktura tanba hetan Kooperasaun servisu entre Governu Timor-Leste no Israel.

“Estudante sira ne’e bá tinan kotuk, tinan-tinan ita haruka estudante sira bá. Tinan sira liubá ne’e ita haruka 30, sa’e ba 50, agora sa’e ona ba 70 tanba haree ba ita Timoroan iha vontade aprende no servisu di’ak sira aumenta kuota,” ministra esplika.

Notísia Relevante :Estudante Timoroan 72 iha Israel hakarak fila mai TL

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here