Sekretária Rejionál Adjuntu Prezidente Autoridade RAEOA ba reforsu institusionál, Leonia Monteiro. Imajen Tatoli/Egas Cristovão

DILI, 28 setembru 2020 (TATOLI)-Autoridade Administrativa Espesiál Oé-cusse Ambeno (RAEOA) deside ona katak funsionáriu públiku, kontratadu no autoridade RAEOA obrigatóriamente uza tais orijinál Oé-cusse ba serbisu iha loron tolu kada semana.

Sekretária Rejionál Adjuntu Prezidente Autoridade Administrativa Espesiál Oé-cusse Ambeno (RAEOA) ba reforsu institusionál, Leonia Monteiro, hateten desizaun ne’e RAEOA foti ho intensaun atu ajuda rendimentu negosiante kiik no negosiante tais sira.

“Ami koordena ona ho Ministériu Turizmu, Komérsiu no Indústria (MTKI) oinsá maka atu uza tais. Tanba ne’e, iha Oé-cusse ami estabelese ona regra ida ba funsionáriu públiku no mós autoridade sira katak kada segunda to’o kuarta orbigatóriu hotu-hotu tenke uza tais,” tenik Sekretária Rejionál ne’e iha edifísiu Ministériu Finansa (MF), Aitarak-laran, segunda ne’e.

Nia dehan, funsionáriu públiku no autoridade, inklui bainaka sira hanesan jornalista, bainhira hakarak ba entrevista autoridade iha RAEOA obigatóriamente hatais tais, nune’e bele halo entrevista no tais ne’e rasik na’in maka tenke sosa rasik.

“Bainhira jornalista sira ba halo entrevista autoridade iha RAEOA, pelu menus tara netik salendan tais oan ida iha kakorok, nune’e hatudu identidade RAEOA nian,” nia akresenta.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here