Diretór Ezekutivu FONGTIL, Daniel Santos do Carmo. Imajen Tatoli/Cipriano Colo

DILI, 28 setembru 2020 (TATOLI)-Fórum Organizasaun Naun Governamentál Timor-Leste (FONGTIL) realiza workshop nasionál ida ho tópiku ‘modelu envolvimentu komunidade iha programa auditoria sosiál 2021’.

Diretór FONGTIL, Daniel Santos do Carmo, hateten workshop ne’e realiza tanba konsidera auditoria sosiál nu’udar prosesu apoiu ba sidadaun sira hodi monitoriza prestasaun serbisu Governu hodi garante dezenvolvimentu nasionál no fó benefísiu ba ema hotu. 

“Auditoria sosiál hanesan instrumentu komunidade atu iha komunikasaun ativu ho Governu liga ho prestasaun serbisu públiku, entaun ita espera katak liuhosi sorumutuk ohin bele prodús dokumentu importante ruma atubele transforma komunidade maka halo no sai na’in  ba programa auditoria sosiál no Organizasaun Naun Governamentál (ONG) sira fó nafatin kapasitasaun ba komunidade hodi halo auditoria sosiál iha sira-nia aldeia, suku no sosiedade iha tinan 2021,” tenik Diretór FONGTIL, iha salaun Paroquial São José Catedral, Vila-Verde, segunda ne’e.

Antes ne’e, ONG sira maka halo auditoria no komunidade envolve ativu de’it fornese informasaun no dadus ba sosiedade sivíl sira, hodi kontinua halo advokasia  análiza hafoin aprezenta ba ministériu ne’ebé iha relasaun ho programa auditóriu sosiál.

“Ho modelu ne’e, ita hanoin katak natureza loloos hosi auditoria sosiál ne’e maka komunidade sai na’in,” nia akresenta. 

Programa ne’e hahú iha VI Governu hanesan inisiativa no inovativu ida maibé bainhira VIII Governu ne’ebé lidera hosi Prmeiru-Ministru, Taur Matan Ruak, iha kompromisu atu kontinua programa fiskalizasaun ne’e.

Tanba ne’e iha tinan 2018 to’o 2020 iha organizasaun lubuk maka hala’o programa ne’e iha setór haat maka hanesan edukasaun, saúde, infrastrutura bázika, no agrikultura.

“Ita mós hakarak profisionál sira bele dudu komunidade sai na’in ba programa auditoria sosiál atu komunidade bele autoriza prestasaun servisu Governu no informa filafali hodi hadi’a prestasaun servisu,” nia subliña. 

Kona-ba rezultadu ne’ebé ONG deskobre iha setór haat ne’e hatudu parte edukasaun la’o seidauk efetivu tanba menus investimentu hosi Governu.

Aleinde ne’e, infraestrutura bázika liuliu bee no saneamentu menus investimentu, entaun ninia konsekuénsia maka sei iha dezafíu boot hanesan falta bee-moos no saneamentu iha eskola públika hotu.

FONGTIL realiza workshop ho apoiu hosi parseria hosi Gabinete Primeiru Ministru, ne’ebé ho objetivu atu dudu partisipasaun  sidadaun sira iha prosesu  dezenvolvimentu nasionál liuhosi programa auditoria sosiál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here