DILI, 28 setembru 2020 (TATOLI)-Ministériu Negósiu Estranjeiru no Kooperasaun (MNEK), relata tuir dadus estudante naun bolseiru hamutuk 2.350 iha rai-liur maka simu ona subsídiu husi Governu iha faze dahuluk nian relasiona ho implementasaun Estadu Emerjénsia tanba COVID-19.
“Pagamentu ba primeira faze selu ona, ida adisionál 500 ital reklamasaun ne’e mós selu hotu ona ne’e mak kuaze 99% mak selu ona,” dehan Ministra Negosiu Estranjeiru no Kooperasaun, Adaljiza Magno, ba jornalista sira iha edifísiu Ministériu Finansa Aitarak-Laran, segunda ne’e.
Notísia Relevante :Governu sei selu tan subsídiu ba Timoroan iha nasaun hitu
Iha pagamentu faze dahuluk nian, Governu aloka millaun $ 2, hodi halo pagamentu ba estudante naun bolseiru ne’ebé estuda iha Áfrika, Ázia, Filipina, Indonézia, Austrália, Europeia, Amérika no seluk tan.
Maibé iha tempu badak, Governu sei halo pagamentu faze daruak ba estudante 30-resin iha nasaun hitu tanba Prezidente Repúblika Francisco Guterres Lú Olo, promulga ona.
Entretantu, iha reuniaun Konsellu-Ministru, foinlalais ne’e halo ona alterasaun no aprovasaun ba dekretu lei hodi halo pagamentu subsídiu faze daruak nian ba estudante Timoroan naun bolseiru iha nasaun hitu hamutuk ema 30-resin.
Timoroan na’in 30-resin ne’e estuda iha nasaun Repúblika Populár Banglades, Reinu Béljica, Repúblika Populár Xina, Repúblika Koreia Súl, Reinu Unidu da Grã-Británia no Irlánda Norte, Repúblika Mozambique no Singapura.
Kona-ba estudante naun bolseiru hamutuk na’in 500-resin ne’ebé la konsege hetan pagamentu iha faze dahuluk nian, oras ne’e MNEK ho Komisaun ba Fundu COVID-19 halo ona aprovasaun hodi halo pagamentu ho osan hamutuk rihun 200-resin.
Notísia Relevante :Governu Aprova Millaun $ 2 Hodi fó Subsidiu ba Estudante
Jornalista: Hortencio Sanchez
Editór : Agapito dos Santos
Hau nudar estudante não Bolseiro iha Indonesia seidaun hetan subsidiu oinsa bele fasilita tan Ami sira nebe seidauk hetan Subsidiu ne. Senhora Ministra Mak ami respeito ho Governo nia Ajuda Ami bele sustenta ami nia Vida iha estrangeiro mk deit obrigado wain….