Comissão Função Pública (CFP), ohin, realiza serimónia asinatura termu aseitasaun pose ba profisionál na’in-ualu (8). Imajen TATOLI/Evaristo Soares Martins.

DILI, 28 setembru 2020 (TATOLI)—Comissão da Função Pública (CFP), ohin, realiza serimónia asinatura termu aseitasaun pose ba tékniku profisionál na’in-ualu (8) ne’ebé mak konsege hetan klasifikasaun aprovadu.

Prezidente CFP, Faustino Cardoso hateten, objetivu hosi serimónia halo termu aseitasaun pose ba tékniku profisionál na’in-ualu (8) ne’ebé maka konsege hetan klasifikasaun aprovadu, hodi tama ba iha rejime foun ida hanaran rejime profisionál seniór iha Administrasaun Funsaun Públika Timor-Leste.

“Ne’ebé, ohin, iha sira na’in-ualu (8) ne’ebé mak simu pose ne’e,  infelizmente ita seidauk hetan feto ida. Sira na’in-ualu (8) ne’e mesak mane hotu de’it. Ba oin, ita hakarak iha mós feto. Sira simu pose ne’e iha área tolu ka haat de’it ne’e maka hanesan área rekursu umanu, jestaun estratéjiku, agrikultura no peska,” dehan Faustino Cardoso ba jornalista sira iha salaun Ministéru Saúde, Paláçio das Cinzas, Caicoli, Dili, segunda ne’e.

Nia hatutan, rejime foun ida-ne’e bazeia ba Dekretu Lei Nú. 22/2017,  atu hodi fó biban ba Eis Diretór Jerál no Inspetor Jerál sira ne’ebé maka iha interese atu ingresa tama ba iha rejime foun ne’e, hodi bele konkorre ho prosesu ne’ebé hahú kedas hosi 2017.

Comissão Função Pública (CFP), ohin, realiza serimónia asinatura termu aseitasaun pose ba profisionál na’in-ualu (8), Imajen TATOLI/Evaristo Soares Martins.

“Dahuluk, hahú ninia baze legál liuhosi Dekretu Lei Nú. 22/2017,  depois tama iha prosesu preparativu ba rekrutamentu ninian ho prosesu rekrutamentu ne’e rasik lori tempu naruk.  Prosesu naruk ne’e lalos tanba kestaun tékniku maibé kestaun polítika ligadu ho mudansa nivél aas,  impase polítika no nune’e mós kestaun orsamentu rasik iha tinan naruk ita la’o ho duodésimu ne’ebé la permite prosesu ne’e la’o atenpada iha tempu loloos. Maibé ikus mai ita konsege konklui no ohin formaliza prosesu ninia resultadu liuliu hosi pose,” nia dehan.

Nia hateten, ba profisionál sira ne’ebé hetan ona mudansa  estatutu no mudansa rejime,  uluk sira iha rejime jerál agora sira pasa ona tama ba rejime profisionál tuir ninia regra prosidimentu inklui mós tuir estrutura saláriu nivel aas ba iha rejime jerál ninian.

Ba sira ne’ebé simu pose ne’e, nia dehan, ema sira ne’ebé mak uluk iha tempu naruk asume kargu diresaun xefia iha rejime jerál nian.  Iha tempu naruk mós Estadu investe sira liuhosi formasaun oin-oin iha rai laran no rai liur liuhosi treinamentu no formasaun sira-ne’e. Agora daudauk sira tama ona ba rejime profisionál atu oinsá maka sira bele aplika kuñesementu teknika sira hetan durante asume kargu diresaun sira, nune’e mós kuñesementu tekniku sira ne’ebé mak mai hosi sira-nia kuñesemtu tekniku nu’udar ema profisionál iha área ida-idak.

Nia hateten, maske pedidu ba iha área sira seluk hanesan jestaun estratéjiku, transporte no komunikasaun, boa governasaun, no área peskiza nian iha  maibé seidauk konsege hetan ema ne’ebé maka klasifikadu atu tama iha rejime profesionál seniór ne’e.

Tékniku profisionál na’in-ualu (8) ne’ebé mak klasifikadu mak hanesan Eugenio João Amado de Maria Soares (Profisionál seniór ba grau A iha espesialidade servisu sosiál), Gil Rangel da Cruz (Profisionál seniór ba grau A iha espesialidade jestaun estratéjika ba agrikultura no peskas), Nelson Philomeno Rego de Jesus (Profisionál seniór ba grau A iha espesialidade investigadór seniór), Edgar Sequeira Martins (Profisionál seniór ba grau A iha espesialidade jestaun rekursu umanu), João de Corte Real Araújo (Profisionál seniór ba grau A iha espesialidade jestaun rekursu umanu), Belarmino Filomeno Neves (Profisionál seniór ba grau A iha espesialidade jestaun rekursu umanu), Áureo José António Sávio (Profisionál seniór ba grau A iha espesialidade tékniku espesializadu ba boa governasaun) no Fernando Carvalho da Cruz (Profisionál seniór ba grau A iha espesialidade jestaun estratéjika ba transporte no komunikasaun).

Jornalista: Evaristo Soares Martins 

Editór: Cancio Ximenes

HAKEREK NO HATÁN

Please enter your comment!
Please enter your name here