Jornalista sira bainhira halo kobertura iha ámbitu luta kontra COVID-19. Imajen Tatoli/Egas Cristovão

DILI, 26 setembru 2020 (TATOLI)-Ministru Asuntu Parlamentár no Komunikasaun Sosiál, Francisco Jerónimo, informa suplementu remuneratóriu ba jornalista liña frente ne’ebé presta serbisu durante luta kontra COVID-19, sei presiza tan despaisu ministeriál.

Despaisu ne’e hosi Ministériu Asuntu Parlamentár no Komunikasaun Sosiál (MAPKOMS) atubele sertifika jornalista liña frente, nune’e Ministériu Finansa (MF) bele halo ona pagamentu.

“Presiza tan despaisu ministeriál, karta tama ona ba ha’u no ha’u hatuun ona ba parte legál sira atu prepara despaisu atu asina, dala ruma segunda ka tersa sira ne’e loos hotu ona,” relata Ministru Francisco, hafoin halo aprezentasaun iha Komité Revizaun Orsamentu Polítika (KROP), iha salau auditóriu MF, Aitarak-laran, sábadu ne’e.

Notísia Relevante: Governu aprova subsídiu ba jornalista liña frente

Governante ne’e dehan, ministériu ba asuntu komunikasaun sosiál maka sei sertifika hodi formaliza diploma ne’e.

“Remuneratóriu ba jornalista liña  frente sira la presiza define ninia tabele atribuisaun orsamentu tanba tabela ne’e define ona iha dekretu lei laran , ne’ebé la presiza tan rezolusaun”, nia akresenta.

Jornalista hirak ne’ebé sei sai benefisiáriu maka durante ne’e asume knaar iha vijénsia Estadu Emerjénsia dahuluk iha loron 27 marsu to’o 27 abríl, iha kondisaun direta ba surtu COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here