Ministru Asuntu Parlamentár Komunikasaun Sosiál, Francisco Jerónimo. Imajen Tatoli/Egas Cristovão

DILI, 26 setembru 2020 (TATOLI)Iha proposta Orsamentu Jerál Estadu (OJE) 2021, Ministériu Finansa (MF) prevee tetu ba Ministériu Asuntu Parlamentár no Komunikasaun Sosiál (MAPKOMS) hamutuk millaun $6,616, maibé iha reuniaun Komité Revizaun Orsamentu Polítika (KROP) propoin tan adisionál millaun $1,2.

Ministru Asuntu Parlamentár no Komunikasaun Sosiál, Francisco Jerónimo, hateten orsamentu adisionál ne’e atu aloka ba Rádiu Televizaun Timor-Leste, Empreza Públika (RTTL, E.P) ba prosesu dijitalizasaun.

“MAPKOMS presiza tan adisionál millaun $1,2, hodi halo instalasaun 30.000 set box antena dijitál inklui instalasaun infraestrutura,” dehan Mininistru Francisco, hafoin halo aprezentasaun iha salaun aditóriu MF, Aitarak-laran, sábadu ne’e.

Antena dijitál ne’e oferese hosi Governu Xina atu halo instalasaun ba uma-kain 30.000 iha munisípiu Dili, Aileu no Manatuto.

“Dijitalizasaun ne’e presiza osan, tanba la prevee iha tetu entaun ami husu adisionál nune’e bele rezolve kestaun ne’e,” nia argumenta.

Nune’e mós, hodi haree ba infraestrutura liga ba konstrusaun torre neen RTTL.

“Ami iha planu halo instalasaun ba torre hamutuk 12, maibé ha’u hanoin bazeia ba kapasidade ministériu nian, ha’u lakohi atu iha ambisaun barak liu halo hotu kedas dala ida, tanba ne’e ha’u hili neen uluk inklui edifísiu própriu ba Agência Tatoli no RTTL,” nia subliña.

Tékniku ba instalasaun torre no dijitalizasaun mai hotu hosi Xina.

“Ami kontaktu ho Embaixada Xina no tékniku sira to’o hotu ona no sira agora serbisu ona iha Kutulau, Fatuhai, no iha RTTL sentrál,” nia informa.

Enkuantu orsamentu tinan oin ba Agência Tatoli, governante ne’e konsidera sufisiente atu halo jestaun interna ba mídia Estadu ne’e.

“Orsamentu ne’ebé maka aloka ba Tatoli halo jestaun iha instituisaun sufisiente, tanba ne’e sira fó filafali osan $7 ba ministériu,” nia informa.

Membru ezekutivu ne’e nota katak, daudaun prioridade ba mídia Estatál hanesan RTTL no Agência Tatoli maka edifísiu própriu.

“Osan sufisiente atu halo servisu, Tatoli presiza de’it maka fatin, orsida sei hamutuk ho RTTL,” Ministru hatutan.

Totál orsamentu ne’ebé iha aloka ba Gabinete MAPKOMS propoin $803.000, Gabinete Sekretaria Estadu Komunikasaun Sosiál (SEKOMS) $774.000, Gabinete Asuntu Parlamentár $90.000, Gabinete Inspesaun $34.500, Dirasaun Jerál Administrasaun  ba Diretór Jerál $41.000 (saláriu no vensimentu, bens servisu), Diresaun Administrasaun no Finansa $65.000, Diresaun Nasionál Aprovizionamentu  no Lojíztika $95.000, Diresaun Nasionál Diseminasaun Informasaun $883.000, Diresaun Nasionál Sentru Rádiu Komunidade $479.000, CEFTEC $662.000.

Enkuantu ba mídia Estatál, Agência Tatoli,I.P $669.900, RTTL millaun $2,193, Diresaun Nasionál Rekursu Umanu (foun) $30.000 no Unidade Planeamentu (foun) $23.000.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here