Administradór munísipiu Manatuto, Fernando de Sousa Junior. Imajen Tatoli/Joanico de Araújo

DILI, 26 setembru 2020 (TATOLI)-Iha diskusaun Komité Revizaun Orsamentu Polítika (KROP) ba proposta Orsamentu Jerál Estadu (OJE) tinan fiskál 2021, munisípiu Manatuto husu orsamentu adisionál millaun $3-resin hosi tetu orijinál millaun $2,655.

Hosi totál ne’e, fahe ba kategoria saláriu no vensimentu $1.046.378, bens no servisu $1.264.315, no transferénsia públika $34.225.

Administradór munisípiu Manatuto, Fernando de Sousa Junior, hateten razaun husu adisionál tanba orsamentu orijinál ne’ebé atribui la sufisiente atu kobre programa.

“Ami presiza osan hodi bele kobre atividade importante seluk, tanba Xefe Governu rasik husu ami atu aloka $100.000 ba kada postu administrativu, entaun tetu orijinál ne’ebé fó mai ami labele kobre. Tanba ne’e maka ami husu tan, maibé hein desizaun hosi KROP,” relata Administradór Munisípiu Manatuto ba Agência Tatoli, hafoin ramata diskusaun KROP iha salaun Ministériu Finansa (MF), Aitarak-laran, sábadu ne’e.

Alokasaun orsamentu 2021 ba munisípiu ne’e reprezenta porsentu 0,17 hosi totál orsamentu.

Autoridade munisipál ne’e esplika, administrasaun munisípiu Manatuto iha programa 14 ba tinan 2021, ne’ebé sei aliña hosi programa ezisténte iha liña ministériu.

Programa sira ne’e mak kompostu hosi jestaun rai no propriedade prevee orsamentu hamutuk $720.000, rejistu, notariadu, no identifikasaun sivíl $750.00,  jestaun rekursu ídriku, no fornesementu água potável tau osan $71.000, no servisu protesaun sivíl $22.564.

Nune’e mós, ba edukasaun pré-eskolár $36.465, ensinu báziku $411.588, ensinu rekorrente $29. 001, servisu saúde primáriu $167.242, dezenvolvimentu konstrusaun, reabilitasaun, manutesaun no jestaun ba estrada, ponte no kontrolu de cheia $41.000, aumentu sustentável produsaun no produtividade $116.500, jestaun prezervasaun rekursu naturál $1.500, asisténsia sosiál $18.436, kontrolu, inspesaun, monitorizasaun, no regulamentasaun ba atividade ekonómika $11.000.

Programa 14 tama iha verba bens no servisu munisípiu nian.

“Kapitál dezenvolvimentu laiha tanba Ministériu Administrasaun Estatál mak sei propoin pur volta millaun $10, ne’e la’ós ba munisípiu Manatuto de’it, kuandu osan ne’e aprovadu ona maka sei aloka ba kada munisípiu. Tuir estimativa ba Manatuto $600.000,” subliña nia.

Orsamentu iha verba kapitál dezenvolvimentu sei hadi’a edifísiu postu administrativu Manatuto villa no postu administrativu Laklubar ho totál alokasaun besik $200.000.

Aleinde ne’e munisípiu Manatuto kontribui inderetamente ba medida Planu Rekuperasaun Ekonómika liuhosi Planeamentu Dezenvolvimentu Integradu Munisípiu (PDIM).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here