Monumentu saudozu Sole Solep inaugura ona iha loron sábadu ne'e iha Suku Lauhata, Postu Administrativu Bazartete, Munisípiu Liquiça. Imajen TATOLI/Evaristo Soares Martins.

LIQUIÇÁ, 26 setembru 2020 (TATOLI)—Ministru ba Asuntu Kombatente no Libertasaun Nasionál, Júlio Sarmento “Meta Malik liuhosi reprezentante Adjuntu Cesar Merak inaugura monumentu saudozu Adjuntu Polítiku no Militár Rejiaun III ho kódigu “Sole -Solep” iha Suku Lauhata, Postu Administrativu Bazartete, Munisípiu Liquiçá, sábadu ne’e.

Notísia Relevante: Liquiça-oan sira harii monumentu Saudozu “Sole-Solep” iha Lauhata

Molok halo inaugurasaun, saudozu nia família haruka konvite ba Ministru ba Asuntu Kombatente no Libertasaun Nasionál, Júlio Sarmento “Meta Malik”, Sekretáriu Estadu ba Asuntu Kombatente no Libertasaun, Gil da Costa Monteiro “Oan Soru” no Prezidente Konsellu Nasionál Veteranu, Vidal de Jesus “Riak Leman”, maibé nai ulun hirak ne’e labele marka prezensa tanba preokupa ho diskusaun Orsamentu Jerál Estadu (OJE) 2021 nian iha Ministériu Finansa, Dili.

Monumentu saudozu Sole Solep inaugura ona iha loron sábadu ne’e iha Suku Lauhata, Postu Administrativu Bazartete, Munisípiu Liquiça. Imajen TATOLI/Evaristo Soares Martins.

“Razaun preokupa ho OJE ne’e mak ita-nia na’in sira labele marka prezensa, sira delega ha’u mai ko’alia iha fatin ida-ne’e hodi hamutuk ho família, uma-mane no mane-foun mai inaugura monumentu ida-ne’e. Saudozu fakar-raan no ruin naklekar to’o agora buka seidauk hetan. Konsellu Kombatente Libertasaun sei tuur hamutuk ho família sira hodi buka hamutuk, atu-bele identifika nafatin ninia paraderu,” Reprezentante Governu, veteranu merak esplika liuhosi nia diskursu iha Suku Lauhata, Postu Administrativu Bazartete, Munisípiu Liquiçá, sábadu ne’e

Adjuntu Merak hateten, serimónia ne’e halibur ema barak la’ós tanba Felisberto Maria dos Santos maibé tanba naran kódigu “Sole Solep” ne’ebé “Sole” katak “La’o” no “Solep” signifika “La’o Ona”.

“Naran ne’e sagradu tebes. Ohin, ita inaugura monumentu saudozu Adjuntu Polítiku no Militár Rejiaun III nian tanba fakar-raan no ruin naklekar iha rai Timor Lorosa’e hodi luta defende luta ba libertasaun nasionál,” nia dehan.

Adjuntu Merak husu ba família tomak, karik rona informasaun ruma relasiona ho saudozu “Sole Solep” nia mate fatin ka hakoi fatin bele hato’o hela ba konsellu, nune’e bele haloot iha fatin ne’ebé apropriadu no dignu.

“To’o ohin nia mate, rate laiha tanba ita lahatene loos iha-ne’ebé. Nia mate iha 1997, hela de’it tinan-rua ita atu tama ba ita-nia Liberdade,” nia hateten.

Alin hosi Saudozo Sole-Solep, Marcelino Fransico dos Santos hosi uma lisan Taha Ma’u Bei Solo, husu Estadu atu ajuda mós buka-tuir paradeiru saudozo nian ka hakoi fatin.

“Ami agora buka hela maske ninia monumentu inagura ona. Ami halo kedas ho kore-metan ba saudozu nia pai. Iha tempu Indonézia bainhira nia moris, ami atu atu halo kore-metan maibé saudozu dehan labele lai. Hein liu tiha lai 1999 mak ita bele halo kore-metan maibé 1999 nia mate,” nia haktuir.

Hanesan alin koñese momoos saudozu ninia prinsípiu tanba la gosta liafuan ema bolu liurai ne’e.

Monumentu saudozu Sole Solep inaugura ona iha loron sábadu ne’e iha Suku Lauhata, Postu Administrativu Bazartete, Munisípiu Liquiça. Imajen TATOLI/Evaristo Soares Martins.

“Momentu ne’e ha’u sei joven, nia hatete mai ha’u katak maske baze de apoiu rahun ona maibé ita tenke buka ligasaun tún-sa’e hodi nune’e ita bele sai hosi atan ne’e. Rende ba Indonézia labele. Se ita rende sai atan liután ou bele mate. Entaun, nia dehan luta ne’e seidauk hotu. Ita tenke avansa,” Marcelino haktuir liafuan ne’ebé saudozu “Sole-Solep” hameno hela ba nia.

Nia hatutan, Estadu dehan ba sira katak ema ne’ebé mak buka tuir restu mortais hetan ona tanba ne’e mak matadalan to’o mai uma ne’e maibe to’o agora familia seidauk bele ba hetan tanba COVID-19.

Tuir informasaun ne’ebé família hatene saudozu inimigu oho iha Baucau tanba saudozu nia partisipasaun iha prosesu luta ba libertasaun nasionál iha Rejiaun III.

Família espera sedu ka tarde bele identifika paradeiru saudozu “Sole Sole nian.

Reprezentante Família ne’e mós fó-sai katak monumentu ne’e finaliza la’ós hetan apoia hosi Estadu maibé liuhosi ninia osan pensaun no kontribuisaun boot liuhosi família.

Iha Inagurasaun monumentu ne’e partisipa hosi Administadór Postu Administrativu Bazartete, Veteranu Liquiçua, parte PNTL, Reprezentate FALINTIL-Forsa Defeza Timor-Leste (F-FDTL) hosi Komponente  Navál no família uma-mane no mane-foun sira kuaze atus lima-resin.

Jornalista: Evaristo Soares

Editór: Cancio Ximenes

HAKEREK NO HATÁN

Please enter your comment!
Please enter your name here