ERMERA, 25 setembru 2020 (TATOLI)-Care Internasionál iha Timor-Leste, iha sesta ne’e apoiu livru ona 130 ba estudante 200 ensinu báziku filiál I,II siklu Eraulu Munisípiu Ermera.
Distribuisaun livru ne’e hodi kompleta programa mini biblioteka hanaran kantu lee ba estudante sira hodi estuda
“Ita ohin apoiu ona livru ba eskola Eraulu ne’e tanba sira iha ona biblioteka mini “kantu lee” ho ida ne’e parte eskola bele hahú implementa sistema empresta livru ba estudante sira hodi lori ba uma atu bele lee,” Xefe Programa Edukasaun no Nutrisaun HATUTAN, Care Internasional iha Timor Leste, Nicole Seibel, hafoin entrega livru ne’e iha Eraulu, sesta ne’e.
Livru ne’e atu fasilita estudante sira atu estuda iha uma relasiona ho pandemia globál COVID-19 ne’ebé obriga labarik sira atu mantein distansia sosiál.
“Livru sira ne’ebé mak Care apoiu ne’e husi MEJD nian mak kona-ba matadalan alfabetu no simblu sira no mós livru kona-ba istoria ho lian tetun, livru sira ne’e hakerek no prodúz husi MEJD, Fundasaun Alola no seluk tan,” nia dehan.
Ajénsia Internasionál ne’e mós iha planu sei distribui livru hanesan ba estudante iha Munisípiu Ainaro, Ermera, Liquiça no Manatuto hamutuk rihun 52.
Jornalista : Tomé Amado
Editór : Agapito dos Santos