Sekretáriu Estadu Kooperativa, Elizário Ferreira, desimina informasaun ba kooperativa micro no pequenas empreza tuir polítika VIII Governu Konstitusionál, iha Bairro Pité, sesta (25/09). Imajen Tatoli/Egas Cristovão

DILI, 25 setembru 2020 (TATOLI)-Sekretáriu Estadu Kooperativa (SEKoop), Elizário Ferreira konvoka enkontru traballu ho jerente kooperativa sira hodi ko’alia kona-ba implementasaun programa rekuperasaun ekonómika ne’ebé Governu dezeña ona.

Enkontru koordenasaun ne’e ho tema: ‘diseminasaun ba kooperativa mikro no pequena empreza tuir polítika VIII Governu Konstitusionál.’

“Ami ko’alia oinsá asegura programa rekuperasaun ekonómika, nune’e programa ne’e nafatin iha sustentabilidade asegura bein estár no kontribui ba ekonomia família, inklui dezenvolvimentu ekonomia nasaun,” dehan Sekretáriu Estadu Elizário, iha Federasaun Kooperativa Hanai Malu, Bairro Pité, sesta ne’e.

Ba inisiativa ne’e, nível nasionál sei koordena asegura relasaun institusionál to’o nível munisípiu inklui mobiliza rekursu ba implementasaun planu rekuperasaun ekonómika ho di’ak.

“Enkontru ne’e define mós tarefa traballu nível nasionál no munísipiu kona-ba saida maka atu halo, nunee bele implementa programa ho di’ak,” nia akresenta.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

SEKoop garante produtu grupu kooperativa sufisiente hatan ba cesta bázika

Governante ne’e otimizta nu’udar instituisaun ne’ebé integra iha implementasaun programa rekuperasaun ekonómika kurtu prazu, SEKoop daudaun ne’e prepararadu tebes tanba hahú mobiliza ona grupu kooperativa sira identifika produtu ba implementasaun programa cesta bázika.

“Porsentu 40 hosi orsamentu planu rekuperasaun ekonómika integra iha orsamentu SEKoop, tanba ne’e ami halo esforsu hodi implementasaun programa ne’e bele fó benefísiu direta ba povu iha nível hotu,” nia tenik.

Orsamentu rekoopersaun ekonómika ne’ebé prevee ba SEKoop hamutuk milliaun $24.

Daudaun ne’e Sekretaria Estadu ne’e mobiliza ona grupu kooperativa hodi identifika produtu hanesan sorghum tonelada 1.800, hare 1.600, koto, fehuk-ropa, no produtu seluk tan.

Enkuantu SEKoop rejista ona grupu kooperativa hamutuk 214 no membru individu 47.000.00 maihosi territóriu Timór.

Ba kurtu prazu hanaran mitigasaun impaktu ekonómiku no sosiál ba krize COVID-19, Governu implementa medida haat ho kustu totál millaun $113,4, komposru hosi cesta bázika ba família, ne’ebé sei implementa iha fulan novembru no dezembru ho totál kustu millaun $71,5, subsídiu retoma implementa iha fulan agostu to’o dezembru ho totál kustu millaun $35, despeza kontributiva ne’ebé implementa iha fulan jullu to’o dezembru ho totál kustu millaun $3,6 no ikus liu apoiu espesiál  ba traballadór informál ne’ebé sei implementa iha fulan outubru to’o dezembru ho totál kustu ba medida ne’e maka millaun $3,3.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here