Sekretária Estadu Igualdade no Inklusaun, Maria Jose da Fonseca Monteiro de Jesus. Imajen/ Egas Cristovão

DILI, 25 setembru 2020 (TATOLI)—Sekretária Estadu Igualdade no Inkluzaun (SEII), Maria José da Fonseca Monteiro de Jesus, prioritiza redús dezigualdade entre feto no mane iha ámbitu desizaun no polítika asesu ba setór hotu-hotu.

Sekretária Estadu Igualdade no Inkluzaun, Maria José da Fonseca Monteiro de Jesus, hateten  montante ida-ne’e sei hala’o advokása, hasa’e partisipasaun feto nian iha nível polítika iha ámbitu foti desizaun sira no medida prinsipál importante sira-ne’ebé temi iha livru planu asaun anuál.

“Redús  dezigualdade entre feto no mane iha ámbitu asesu ba rekursu no opurtunidade espesialmente asesu ba podér, kontrolu rekursu sira, alkansa desizaun iha vida sosiu-ekonómika, polítika no asesu ba justisa no seguransa,” Sekretária Estadu Igualdade no Inkluzaun ne’e informa ba jornalista sira, hafoin hala’o audiénsia ho Komisaun F (Saúde, Seguransa Sosiál no Igualdade Jéneru) iha Parlamentu Nasionál, sesta ne’e.

Bazea ba livru 2 (Planu Asaun Anuál) deskreve medida prinsipál setoriál SEII nian ba tinan 2020 mak promove no halo abordajen integrada jéneru iha polítika, lei sira, programa sira, planu sira no orsamentu públiku no komunidade.

Nune’e mós mellora no reforsa sistema formál justisa nian hodi pevene violénsia, kria mudansa atitude no mentalidade relasaun ho  prevensaun Vilolénsia Bazeia ba Jenéru (VBG-sigla portugés) iha komunidade.

SEII sei asegura partisipasaun feto sira iha nível nasionál, munisipál no suku sira iha dezenvolvimentu ekonómiku, iha vida polítika iha nível sira foti desizaun sira no ikus liu mak promove governasaun di’ak, jestaun institusionál no fortalese kapasidade rekursu umanu.

Ho medida prinsipál hirak ne’e, Sekretaria Estadu Igualdade no Inkluzaun prevee orsamentu 2020 nian hamutuk $959,910 komposta hosi saláriu no vensimentu $429,757, bens no servisu $482,153 no transferénsia públika $48,000.

Maria José da Fonseca Monteiro de Jesus, fó-sai katak hosi montante orsamentu ezekuta ona rihun $500-resin hahú hosi janeiru to’o setembru, hela de’it $400-resin ba fulan outubru, novembru no dezembru.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here