Ofisiál F-FDTL iha selebrasaun aniversáriu FALINTIL ba dala-44 iha Kuartél Jenerál Fatuhada, Dili, 20 sgostu 2019. Imajen Tatoli/António Gonçalves

DILI, 25 setembru 2020 (TATOLI)-Ministériu Defeza (MD) ho Komandu FALINTIL-Forsa Defeza Timor-Leste (F-FDTL), ohin,  hala’o audiénsia ho Komisaun B Parlamentu Nasionál Asuntu Negósiu Estranjeiru Defeza no Seguransa, hodi justifika sira-nia proposta husu osan $21.494 iha polítika Orsamentu Jerál Estadu (OJE) 2020.

Notísia Relevante : OJE 2020, MI foku selu dívida PNTL no responde ba família afetadu dezastre naturaís

Aprezentasaun no justifikasaun ba proposta MD ho F-FDTL nian ne’e diretamente  hala’o direita hosi Ministru Defeza, Filomeno Paixão de Jesus, Komandante F-FDTL, Xefe Estadu Maiór Kolonel Calisto “Coli-Coliati” no akompaña hosi ekipa tékniku no kargu xefia sira ba Prezidente Komisaun B -PN, Agostinho Sequeira “Somotxo” no membru komisaun B sira seluk tan.

Hosi totál orsamentu $21.494 ne’ebé MD ho Komandu F-FDTL husu iha OJE 2020 ne’e atu koloka ba Ministériu Defeza $4.840 no ba F-FDTL $16.653.

Proposta orsamentu MD ho F-FDTL nian ne’e sei aloka ba kategoria saláriu  no vensimentu $9.776, bens servisu $11.718 no ba kapitál menór ho kapitál dezenvolvimentu laiha (0).

Tuir livru 2 (Planu Asaun Anuál) deskreve medida prinsipál setoriál iha 2020 maka hanesan, promove, garante, no salva guarda defeza nasionál  hodi halo rekrutamentu foun membru F-FDTL.

Promove no mellora saúde jerál efetivu sira iha F-FDTL, partisipa ezersísiu konfinadu iha ámbitu kooperasaun tékniku militár no organizasaun internasionál. Realiza operasaun hodi garante estabilidade no seguransa apoiu populasaun no defeza iha área rekursu umanu, mellora kondisaun militár liuhosi manutensaun no rekuperasaun instalasaun militár.

Promove hodi halo melloramentu no manutensaun iha meius transporte no ekipamentu, dezenvolve kapasidade interna iha manutensaun. Dezenvolve sistema baze  dadus lojístika nian, implementa polítika jéneru, promove governasaun di’ak,  no jestaun institusionál iha servisu hotu iha ministériu refere.

Kona-ba dotasaun orsamentu temporáriu (DOT), Ministériu Defeza ne’ebé lidera husi Ministru Filomeno da Paixão de Jesus, kontinua ezekuta hela.

 Jornalista  : Eugénio Pereira

Editór        : Francisco Simões