Ministru Asuntu Parlamentár no Komunikasaun Sosiál, Francisco Jerónimo (klaran), akompaña hosi membru Governu balun, lansa ‘revista loron-100’, ne’ebé relata prioridade no progresu serbisu, iha salaun auditóriu MTK, Caicoli, sesta (25/09). Imajen Tatoli/Joanico de Araújo

DILI, 26 setembru 2020 (TATOLI)-Ministru Asuntu Parlamentár no Komunikasaun Sosiál  (MAPKOMS), Francisco Jerónimo, ofisiálmente lansa prioridade no  progresu serbisu durante loron-100, hahú juñu to’o agora, hafoin hetan fiar hosi VIII Governu Konstitusionál no simu pose iha 29 maiu 2020 nu’udar membru Governu.  

Tuir Ministru Francisco, serbisu ne’ebé relata ho modelu revista ne’e ho objetivu atu fó sai informasaun ba públiku kona-ba progresu serbisu ne’ebé MAPKOMS atinje ona.

“Programa prioridade loron-100, atinje no relata hotu iha revista ne’e,” dehan  governante ne’e, hafoin seremónia lansamentu iha salaun auditóriu Ministériu Transporte no Komunikasaun (MTK), Caicoli, sesta ne’e.

Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen Tatoli/Joanico de Araújo

Serbisu ne’ebé ministériu foun ne’e konsege atinje ona maka ajusta orgánika MAPKOMS ho orgánika VIII Governu Konstitusionál, konsege aprova duni iha Konsellu Ministru no sei iha prosesu promulgasaun hosi Prezidente Repúblika.

Programa seluk maka halo vizita ba mídia nasionál estatál no privadu, ne’ebé maka realiza hotu, maski falta mídia rua maka seidauk hetan vizita.

“Ha’u-nia vizita hotu ba mídia sira, nota katak kondisaun balun di’ak oituan. Iha kondisaun balun maihosi abilidade jornalizmu hakarak hamutuk loke mídia hodi kontribui ba ita-nia prosesu dezenvolvimentu, tamba ne’e maka Governu sei la taka matan ho kondisaun sira ne’e,” nia akresenta.

Programa seluk maka kria relasaun di’ak entre Parlamentu Nasionál no Governu, tuir knaar MAPKOMS.

“Relasaun entre Parlamentu ho Governu, ha’u hanoin la’os hanesan uluk maibé loron ba loron di’ak no komunikasaun entre parte rua la’o kapas tebes. Buat balun akontese iha Governu, MAPKOMS transmite ba Parlamentu no saida mak akontese iha Parlamentu transmite kedas ba Governu hodi bele entende malu no fó solusaun ba problema saida maka hasoru,” nia haktuir.

Nune’e mós, konsege halo dekretu-lei ba subsídiu apoiu mídia sira, ne’ebé konsege pasa iha nível Governu maibé Prezidente Repúblika veta polítika hodi lori filafali mai Governu.

“Ha’u iha hanoin seluk, la promete maibé ha’u sei haka’as-an atu hadi’a filafali, nune’e buka dalan seluk atubele submete lejizlasaun ne’e ba Konsellu Ministru hodi halo diskusaun no bainhira aprova sei lori filafali ba Prezidente Repúblika hodi promulgasaun,” nia relata.

Programa ne’ebé MAPKOMS planeia atu halo maka fó formasaun ba asesoria imprensa sira.

Alende ne’e, prioridade ba kestaun liga ba aréa komunikasaun sosiál maka atu hakbiit Rádiu Televizaun Timor-Leste, Empreza Públika (RTTL, E.P) hodi bele halo transmisaun kobre hotu iha territóriu nasionál no seluk maka haforsa Agência Noticiosa de Timor-Leste, Tatoli.IP hodi kontinua la’o ba oin.

Partisipa iha seremónia ne’e maka Ministru Edukasaun, Juventude no Desportu Armindo Maia, Ministru Ensino Superiór Longinhos dos Santos no membru Governu seluk, Prezidente RTTL, E.P Francisco sa Silva Gary, Prezidente Agência Tatoli interinu Manuel Pinto, Prezidente Concelho de Imprensa Virgílio Guterres, entidadade relavante sira inklui funsionáriu MAPKOMS

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here