Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen Tatoli/Joanico de Araújo

DILI, 25 setembru 2020 (TATOLI)-Ministériu Asuntu Parlamentár no Komunikasaun Sosiál (MAPKOMS) planeia estabelese unidade komunikasaun sosiál iha kada ministériu sira, nune’e bele fasilita divulga informasaun ba atividade Governu iha nasionál to’o área rurál no públiku bele akompaña ho di’ak.

Tuir Ministériu Asuntu Parlamentár no Komunikasaun Sosiál, Francisco Jerónimo, razaun atu estebelese unidade ne’e iha kada ministériu tanba durante ne’e membru Governu bainhira asume knaar, mai ho asesoria imprensa (media officer) ho nomeasaun polítika, tanba ne’e bainhira mandatu ministru ida ramata laiha ema maka toma konta kona-ba divulgasaun informasaun ba lala’ok ministériu.

“Ha’u hanoin hakarak introdús unidade idaidak iha ministériu kona-ba komunikasaun sosiál, atu nunee bainhira ministru ida sai no media officer sai,  unidade komunikasaun sosiál nafatin iha, atu nune’e memória institusionál sei iha nafatin. Ita hahú ho foun fali maka dala barak laiha kontinuidade,” dehan  Ministru Francisco iha salaun auditóriu Ministériu Transporte no Komunikasaun, sesta ne’e.

Membru ezekutivu ne’e hatutan, nu’udar membru Governu ne’ebé maka tutela ba aréa komunikasaun sosiál iha interese tebes atu implementa programa ne’e.

“Ha’u nota katak dala barak media officer sira ne’e mai pakote ida ho ministru, tanba ne’e sira presiza iha koordenasaun ho parte MAPKOMS,” nia akresenta.

Governante ne’e konsidera, presiza mós eleva kapasidade asesoria imprensa ministériu sira.

“Sira tenke hetan formasaun barak hosi parte MAPKOMS ninian, tanba ami iha Sentru Formasaun Teknólojia no Komunikasaun (CEFTEC, sigla portugés) ne’ebé maka toma konta fó formasaun,” nia fó hanoin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here