Komandante PNTL Munisípiu Dili, Superintendente Xefe Henrique da Costa. Imajen Tatoli/Eugénio Pereira

DILI, 25 setembru 2020 (TATOLI)-Komandu Polísia Nasionál Timor-Leste (PNTL) hatún ona despaxu hodi orienta membru Ofisiál Polísia Suku (OPS) atu implementa programa “Polísia vizita uma komunidade” atu sosializa prevensaun konflitu no hametin dame.

Notísia Relevante : Komandu PNTL koloka OPS ajuda kontrola movimentu transporte iha suku

Komandante Polísia Munisípiu Dili, Superintendente Xefe, Henrique da Costa, esplika, programa polisia vizita uma komunidade ne’e mós ho objetivu atu lori polísia besik liután ba povu.

Komandu PNTL mós implementa ona programa “Polísia ba kampus” hodi halo sosializasaun prevensaun konflitu ba universitáriu sira atu kontribui ba hametin estabilidade iha Dili no iha territóriu nasionál.

“Polísia vizita ba Uma ne’e OPS maka tama povu nia uma hodi ko’alia ho uma-na’in sira no grupu juventude sira, oinsá ita buka solusaun hodi lori PNTL ninia mehi ho hakarak lori Dili sai fatin seguru ba ema hotu,” hateten Komandante Henrique da Costa, ohin, ba jornalista iha Komandu PNTL, Caicoli, Dili

Polisia mós halo patrullamentu la’o ain no patrullamentu ho karreta hodi suporta seguransa ba polísia eskuadra sira hodi bele halo prevensaun ba krime.

“Ami mós kria atividade lubuk ida hanesan, jogu amizade ho universidade sira. Tanba universidade iha estudante bele too 4,000 no 8,000 hodi aproveita  ajuda malu oinsá hametin paz no estabilidade,” nia hateten.

Ba oin PNTL sei halo mós atividade kompetisaun jogu amizade ho orgaun komunikasaun sosiál sira hodi no kria koopera servisu di’ak liután.

Tuir analiza Komandu PNTL haree, durante ne’e kazu krime iha Dili sempre akontese kauza husi joven barak la iha servisu. Mezmu nune’e, PNTL iha misaun boot atu halo prevensaun hodi garante paz no hakmatek ba nasaun no povu tomak.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here