Kooperativa Agríkola. Imajen/Espesiál

DILI, 25 setembru 2020 (TATOLI)–Primeiru-Ministru (PM), Taur Matan Ruak, konvoka enkontru ho Sekretária Estadu ba Igualdade no Inkluzaun (SEII), Maria José da Fonseca Monteiro de Jesus, Sekretáriu Estadu Arte no Kultura (SEAK), Teófilo Caldas, Sekretáriu Estadu Juventude no Desportu, Abrão Saldanha (SEJD) no Sekretáriu Estadu Kooperativa (SEKoop), Elizário Ferreira hodi ko’alia kona-ba programa insentiva grupu komunitáriu.

Iha sorumutuk ne’e, Xefe Governu fó sujestaun ba membru Governu na’in-haat ne’e kona-ba modelu apoiu komunitária ne’ebé tinan oin sei implementa ba grupu komunitária tolu hanesan juventude, feto no  lia-na’in sira.

“Programa insentiva komunitária nu’udar inisiativa Primeiru-Ministru ho objetivu atubele dudu ekonomia informál komunidade iha rurál no konsidera ho forma ne’e bele ajuda hamenus komunidade sira husik hela sira-nia suku hodi ba hadau moris iha kapitál sidade hanesan akontese daudaun ne’e,” dehan Sekretária Estadu Maria José da Fonseca, iha Palásiu Governu, hanesan haktuir iha nota ne’ebé Agência Tatoli asesu iha sesta ne.

Notísia Relevante: Governu planeia kria kooperativa komunitária, suku ida estabelese kooperativa rua

Tuir Governante ne’e, Governu presiza insentiva grupu komunitáriu sira iha área remota ba vida empoderamentu komunitária hodi bele  organiza-an no iha kbiit sustenta ekonomia família.

“Ho prezensa SEKoop bele haree ita-nia programa empoderamentu ne’ebé sei to’o iha suku, neneik ita hakarak dudu grupu sira hotu hodi forma grupu kooperativa sira. Primeiru-Ministru fó ona instrusaun ba instituisaun tolu idaidak haree oinsá mak bele asegura iha orsamentu hodi bele finansia inisiativa foun ne’e,” Sekretária Estassu ne’e subliña.

Fundu insentiva komunitária ne’ebé Governu atu fó ho forma impréstimu, ne’ebé benefisiáriu atu asesu fundu ne’e tenke utiliza didi’ak ba atividade hanesan kuda modo, hakiak animál, halo atividade negósiu ki’ik no atividade sira seluk ne’ebé iha rendimentu grupu.

Kona-ba mekanizmu implementasaun nian, sei jere hosi Sekretaria Estadu sira hanesan ba grupu feto sei jere hosi SEII, ba grupu juventude jere hosi SEJD, ba grupu lia-na’in sira jere hosi SEAK ho apoiu jestaun hosi SEKoop.

Timor-Leste iha suku suku 442, tanba ne’e Governu sei halo intervensaun iha nível suku, ne’ebé instituisaun idaidak sei bá terrenu atu asegura katak suku sira hetan atensaun.

“Maibé depende hosi orsamentu ne’ebé ami sei hetan tanba ita iha tetu fiskál limitadu, entaun hosi orsamentu ne’ebé sei hetan maka ami bele deside suku ne’ebé maka ami sei bá,” nia akresenta.

Intervensaun ne’ebé Sekretaria Estadu hirak ne’e sei halo mak hosi SEII sei foku iha empoderamentu ekonómiku ba grupu feto no ema ho defisiénsia, komunidade LGBT, SEJD sei foku ba joven sira inklui Konsellu Polísiamentu Komunitária (KPK) no hosi SEAK sei haree liubá inan-aman no maluk sira ne’ebé envolve iha arte no kultura (lia-na’in).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here