Karreta ho marka Nissan Terrano no númeru matrikula 21:630 ne'e nu'udar parte husi karreta Estadu ne'ebé Abril Pereira, tinan barak utiliza ba interese privadu. Imajen/Dok.CAC

DILI, 25 setembru 2020 (TATOLI)-Ekipa Fiskalizasaun Konjunta (EFK) identifika ona karreta Estadu 60-resin mak funsionáriu públiku  no eis funsionáriu públiku balun utiliza ba interese privadu.

Notísia Relevante : EFK foti obrigatóriu karreta Estadu ida husi eis funsionáriu ME

Ekipa Fiskalizasaun Konjunta ne’e kompostu hosi Komisaun Anti-Korrupsaun (CAC), Polísia Nasionál Timor-Leste (PNTL), Komisaun Funsaun Públika (CFP), Diresaun Nasionál Transporte  no Terrestre (DNTT) no Diresaun Nasional  Patrimóniu  Estadu (DNPE)-Ministériu Finansa.

Pontu vokál CAC, Euclides Vidal Madeira, informa, tuir lista viatura Estadu hirak ne’e  iha ministériu 10-resin, inklui Ministériu Obras Públika.

Ekipa Fiskalizasaun Konjunta (EFK) hala’o asaun represivu hodi foti obrigatóriu karreta Estadu ida husi eis funsionáriu kontratadu iha Ministériu Edukasaun (ME), Lindo Mendonça da Silva. Dili, 25 setembru 2020. Imajen Tatoli/Nelson de Sousa

Hosi karreta sira-ne’e,  Euclides Vidal Madeira hateten, karreta 40-resin mak ho tipu apoiu husi doadór internasionál sira no 20-resin  mak  kargu xefia sira bainhira asume kargu utiliza, maibé ikus mai remata ona  sira-nia kargu  lakohi entrega fila-fali patrimónia sira-ne’e ho razaun katak sira mak halo manutensaun no enxe kombustivel.

“Ida ne’e tuir lei labele no ekipa sei rekolla patrimóniu ne’ebé funsionáriu sira lakohi entrega ba Diresaun Nasional Patrimóniu Estadu atu bele fila-fali ba Estadu,”  informa Euclides Vidal Madeira  ba jornalista, bainhira hala’o asaun represivu ba karreta Estadu iha Aldeia Berbidus, Suku Becora, Postu Administrativu Kristu  Rei, Munisípiu Díli, ohin.

Ekipa konjunta  halo ona  notifikasaun ba funsionáriu atu obrigatóriu ka voluntáriamente  entrega hikas veíkulu Estadu nian ne’ebé sira utiliza ba interese privadu.

Patrimóniu hirak ne’e rejista ona Diresaun Patrimóniu Estadu no EFK rasik kontinua hala’o rekollamentu ba patrimóniu Estadu hirak ne’e iha utilizadór sira-nia liman.

Nia afirma, iha rekollamentu ne’e ekipa sei hala’o relatóriu no analiza kuandu iha infrasaun ruma sei halo  auto-notísia krime hodi prosesa tuir dalan legal. Tanba ne’e, bainhira  iha rekollamentu ba karreta Estadu ekipa sei hato’o rekomendasaun ba ministériu Finansas, Diresaun Patrimóniu Estadu, hodi deside karreta ne’ebé mak bele hala’o re-alokasaun fila-fali ba ministériu seluk bele uza ka ba leilaun.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here