Prezidente Komisaun Funsaun Públika (CFP-sigla portugés), Faustino Cardoso Gomes. Imajen/António Gonçalves.

DILI, 25 setembru 2020 (TATOLI)—Comissão da Função Pública (CFP) fó prioridade ba iha medida prinsipál tolu (3) iha proposta Orsamentu Jerál Estadu (OJE) 2020 hodi garante setór públiku bazea ba padraun profisionalizmu no integridade.

Proposta orsamentu 2020 hosi Comissão da Função Pública (CFP) ho montante $2,240,244 ne’ebé fahe ba saláriu no vensimentu $ 1,169,716, bens no servisu $1,070,528.

CFP hanesan setór públiku presta servisu sira ho kualidade iha estadu no povu liuhosi garante jestaun efisiente, efetiva no ekonómika hodi dezempeña setór públiku ho di’ak, no halo tratamentu justu no adekuada ba funsionáriu públiku, ajente sira iha administrasaun públika bazea ba Lei nú. 7/2009, de 15 de julho, Artigo 4º).

Prezidente CFP, Faustino Cardoso Gomes, hateten CFP ezekuta ona orsamentu hahú hosi janeiru to’o setembru liuhosi Dotasaun Orsamentu Temporáriu (DOT) 66% no hela de’it 34% ba fulan outubru, novembru no dezembru.

“Comissão da Função Pública iha ninia medida prinsipál tolu, iha nia sub-programa ualu (8), hosi nia programa hamutuk 23. Ida, mak kapasitasaun dezenvolvimentu iha Funsaun Públika, kapasidade institusionál no haree liubá planeamentu forsa traballu nian,” Faustino Cardoso Gomes hateten ba jornalista sira hafoin halo audisaun ho Komisaun A (Justisa no Konstitusionál), iha Parlamentu Nasionál, kinta horisehik.

Bazea livru 2 (Planu Asaun Anuál) media prinsipál setoriál iha 2020 hosi KFP nian mak kontribui ba dezenvolvimentu iha Funsaun Públika, nomeasaun no promosaun funsionáriu públiku maibé sei realiza 2021, implementasaun polítika insentivu, distinsaun no premiu.

Nia hatutan, CFP mós halo revizaun no promosaun foun ba regulamentu Funsaun Públika nian, kontinua halo avaliasaun dezempeñu, planeamentu forsa traballu iha setór públiku, halo mapeamentu ba funsionáriu sira ho defisiénsia (Inkluzaun).

CFP sei halo investigasaun iha prosesu disiplinár sira iha Funsaun Públika,  halo prosesamentu ba pedidu sira iha pensaun pensaun no  apozentasaun (Aposentação/Reforma obrigatária), halo diseminasaun informasaun kona-ba lejislasaun Funsaun Públika nian.

Medida prinsipál seluk mak promove governasaun no jestaun institusionál, fortalese kapasidade rekursu umanu.

Hosi medida prinsipál hirak ne’e sei hala’o jestaun no dezenvolvimentu iha  Funsaun Públika hamutuk $694,904 ne’ebé prevee iha bens no servisu.

Orsamentu ho montante $375,624 ne’e prevee governasaun di’ak no jestaun institusionál no programa ikus liu mak saláriu vensimentu ho montante $1,169,716.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here