Komisáriu Adjuntu CAC ba asuntu Prevensaun no Sensibilizasaun, Luis de Oliveira Sampaio. Imajen Tatoli/Jogerjo Guterres

DILI, 25 setembru 2020 (TATOLI)-Hafoin halo akompañamentu direta ba prosesu teste ba rekrutamentu kandidatura traballadór  seasonal worker Australia, Komisaun Anti-Korrupsaun (CAC) nota katak, ema apontamentu polítika iha Sekretaria Estadu Formasaun Profisionál Empregu (SEFOPE) balun infiltra iha prosesu ne’e.

“Ita hetan informasaun,  ema ruma ne’ebé la hetan despaxu atu fó teste la’ós ema tékniku infiltra tama. Tuir loloos servisu diresaun tékniku sira-nian no diretór nasionál sira mak halo observasaun ba prosesu ne’e” informa Luis de Oliveira Sampaio, Komisáriu Adjuntu ba asuntu Prevensaun no Sensibilizasaun CAC, ba Agência Tatoli, iha resintu Parlamentu Nasional, kinta ne’e.

Notísia Relevante : Kandidatu Traballadór timor-oan na’in-900 ba Austrália tuir teste fíziku

Luis Oliveira afirma katak, loloos ema apontamentu polítiku labele envolve iha prosesu teste tanba ne’e servisu tékniku ninian. Ho ne’e, CAC halo komunikasaun kedas ho Diretór Jerál SEFOPE  atu haruka sira fila hodi hala’o servisu seluk no fasil atu identifika  sesé mak envolve iha rekrutamentu refere no labele hetan infiltrasaun husi ema terseiru ka ema apontamentu polítika sira.

Luis de Oliveira Sampaio, informa, prezensa no partisipasaun CAC nian iha prosesu ne’e hetan konvite hosi komisaun organizadora SEFOPE nian.

Nia hateten, CAC nota iha protesta balun hosi joven kandidatura no krítika públika kona-ba prosesu teste no rekrutamentu ne’e, CAC orienta kedas ekipa tékniku sira hodi akompaña prosesu ho besik no di’ak liután.

“Iha akampamentu to’o agora laiha indikasaun ruma, nune’e ita sei analiza informasaun sira no kontinua akompaña nafatin,” hateten Komisáriu Adjuntu CAC, Luis de Oliveira Sampaio.

Notísia Relevante : Kandidatu traballadór munisípiu Dili 13.423 tuir teste iha 21 setembru

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here