Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 25 setembru 2020 (TATOLI)—Membru Komisaun C (Finansa Públika) no Vise-Prezidente Parlamentu Nasionál, Deputada Maria Angelina Sarmento Lopes, hateten Banku Federál Amérika ne’ebé lokaliza iha Estadu Unidu Amérika (EUA) la’ós banku polítiku atu interven iha diverjénsia polítika rai laran maibé ezisténsia banku nian buka lukru.

Notísia Relevante: Governu seidauk simu notifikasaun hosi Banku Federál Amérika

“Prosedimentu hotu-hotu Governu no Parlamentu Nasionál kumpre hela. Banku Federál Amérika, banku ne’ebé buka lukru la’ós banku ne’ebé ho natureza polítiku. Ba sira importante mak osan ne’ebé ita rai iha-ne’ebá kada fulan sira ko’a jurus, sira ko’a bank interest bazea ba kritéria banku nian. Ne’ebé, sira la’ós banku polítiku ne’ebé interven iha diverjénsia polítika rai-laran,”  Membru Komisaun C (Finansa Públika) ne’e informa ba Agência TATOLI, iha resintu Parlamentu Nasionál, sesta ne’e.

Vise-Prezidente Parlamentu Nasionál konsidera informasaun ne’ebé espalla kona-ba konjelamentu ne’e rumoris falsu no laloos.

Nia fundamenta, prosedimentu ne’ebé Governu presiza halo mak ezekusaun la’o ona  hahú hosi janeiru to’o setembru, agora hela de’it outubru, novembru no dezembru tinan fiskál 2020 nian.

“Postura Governu nian prenxe tanba levanta levantamentu estraordinária dala-rua laiha difikuldade, laiha impedimentu. Signifika, Orsamentu Jerál Estadu (OJE) agora mós sei laiha difikuldade Governu liuhosi BCTL ne’ebé autoriza hosi Governu halo levantamentu ba fundu petrolíferu bazea ba tetu orsamentál tinan fiskál 2020 nian,” Deputada Partidu Libertasaun Populár ne’e hateten.

Laiha Konjelamentu

Deputada Maria Angelina Sarmento Lopes hatutan, pedidu levantamentu estraordinária dahuluk ho montante millaun $150 no levantamentu daruak millaun $70 la’o normál hela, laiha impedimentu hosi banku federál hosi EUA ne’e.

“Ha’u atu husu de’it durante laiha Orsamentu Jerál Estadu (OJE) no períodu Estadu Emerjénsia ita la’o ho osan duodésimu, ita halo ona levantamentu dala-rua. Levatantamentu dahuluk hosi fundu petrolíferu realiza iha fulan-abríl no iha fulan jullu. Levantamentu dala-rua ne’e foti hosi fundu petrolíferu. Se levantamentu dala-rua ne’e laiha difikuldade atu foti osan hosi fundu petrolíferu signifika Orsamentu Jerál Estadu (OJE) ne’e nia natureza ba levantamentu mós hanesan,” nia dehan. 

Prosedimentu sira molok halo levantamentu

Iha parte seluk Prezidente Komisaun D (Ekonomia no Dezenvolvimentu), Deputadu Antoninho Bianco, hateten prosesamentu atu halo levantamentu mak tenke tuir Konstituisaun RDTL, Lei Orsamentu no Jestaun Finanseira (LOGF-sigla portugés) no Rejimentu Parlamentu Nasionál.

Nia esplika, fofoun kada ministériu halo planu depois halo aprezentasaun proposta tinan fiskál ida liuhosi jornada orsamentál, Komité Revizaun Orsamentu (KRO) iha nível téknika no nível polítika.

Termina tiha nível téknika hafoin nível polítika ka bolu Komité Revizaun Orsamentu iha nível Polítika (KROP) foti desizaun bazea ba planu kada ministériu nian. Bainhira KROP finaliza sei lori ba Konsellu Ministru hodi hola desizaun koletiva ne’ebé prezide hosi Primeiru-Ministru.

Bainhira Konsellu Ministru apova ona proposta orsamentu iha nível ezekutivu nian, Primeiru-Ministru sei haruka dokumentu orsamentu nian ba Prezidente Parlamentu Nasionál.

Kompeténsia Parlamentu Nasionál nian

Hafoin Prezidente Parlamentu Nasionál simu tiha proposta orsamentu hosi Governu sei halo konvokatóriu ho líder bankada parlamentár sira hodi aprova pedidu Governu nian karáter urjénsia ka normál.

Hetan tiha aprovasaun hosi líder bankada parlamentár sira sei lori ba plenária Parlamentu Nasionál hodi hola desizaun kolejiál ba pedidu Governu nian ne’e, entaun Prezidente Parlamentu Nasionál sei baixa ba Komisaun C (Finansa Públika) halo apresiasaun hodi aprova relatóriu no pareser.

Iha prosesu elaborasaun ne’e Komisaun C sei estuda proposta ninia estrutrua orsamentál, sistema orsamentu no regra konstitusionál sira-ne’ebé hakerek ona iha Lei Orsamentu no lei númeru 13/2009 kona-ba Lei Jestaun Finanseira (LOGF.

Hafoin Komisaun C finaliza relatóriu no pareser sei koordena ho Komisaun Espesializada Permanente sira iha Parlamentu Nasionál hodi halo kalendáriu diskusaun, hahú hosi audiénsia públika, faze jeneralidade, espesialidade no finál globál.

Hafoin hetan aprovasaun finál iha plenária sei haruka fila ba Komisaun C hodi halo redasaun finál molok enkamiña proposta orsamentu ba Prezidente Repúblika.

Prezidente Komisaun D ne’e fundamenta, bainhira hetan ona aprovasaun prosedimentu tuir mai mak Prezidente Parlamentu Nasionál haruka ba Prezidente Repúblika no Prezidente Repúblika nia kompeténsia tuir konstituisaun tenke promulga ka uza direitu veto polítiku ka jurídiku.

Nia dehan, prosedimentu tuir mai mak lei atu (actos) nian tenke públika iha Jornál Repúblika, hafoin publikasaun Jornál Repúblika entaun vigora.

Hosi ne’e Governu liuhosi ministru finansa ka minstériu finansa haruka pedidu ba Banku Sentrál Timor-Leste (BCTL-sigla portugés) katak presiza montante orsamentu hodi finánsia iha tinan fiskál ida hodi hala’o atividade tomak estadu nian.

“Ministru Finansa ka minstériu finansa haruka karta ba BCTL entaun Governadór BCTL haruka karta ida ba Banku Federál Amérika hodi halo levantamentu ba fundu minarai bazea ba montante ne’ebé Governu husu ho baze ba lei orsamentu tinan fiskál ida-nian, ezemplu hanesan 2019 nian. Ne’e mak prosedimentu atu foti osan ne’e, laiha prosedimentu seluk,” Deputadu Antoninho Bianco informa ba Ajénsia TATOLI, iha Parlamentu Nasionál, kinta  ne’e.

Nia fó ezemplu, tuir regra konstitusionál ministru finansa ka minstériu finansa hanesan jestór orsamentu estadu nian husu pedidu ba Banku Sentrál Timor-Leste (BCTL) ne’ebé hanesan jestór operasionál ba fundu minarai nian mak hato’o fali pedidu ba Banku Federál Amérika hodi transfere fundu ne’e bazea ba montante ne’ebé Governu husu, labele ultrapasa montante ne’ebé Governu husu.

BNCTL ne’e mós sei haree bazea ba lei orsamentu ne’e tinan fiskál ida-nian, montante orsamentu hafoin haruka pedidu ida banku federál.

“Ne’e mak bazea legál tanba prosedimentu atu foti mak lei de’it ne’ebé hakerek iha Konstituisaun RDTL artigu 154. Se ne’e prenxe ona laiha prosedimentu seluk,” Prezidente Komisaun D ne’e hateten.

Bazeia ba Konstituisaun RDTL artigu 145 (Orsamentu Jerál Estadu nian) alínea 1 hateten, Governu mak halo Orsamentu Jerál Estadu nian no Parlamentu Nasionál mak sei fó aprovasaun.

Alínea 2 hosi artigu ne’e hatutan, lei orsamentu nian tenke prevee, ho baze iha efisiénsia no efikásia, diskriminasaun reseita no despeza nian, no mós sees hosi dotasaun no fundu sekretu sira.

Alínea 3 hosi artigu ne’e fundamenta, ezekusaun orsamentu sei iha fiskalizasaun hosi Tribunál Superiór Administrativu Fiskál no Kontas no mós hosi Parlamentu Nasionál.

Deputadu Bankada FRETILIN ne’e argumenta, Governu kumpre ona no hela de’it kompeténsia Parlamentu Nasionál nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here