Audisaun públika entre komisaun Parlamentu Nasionál no MPM, ANPM, Timor GAP no IGP ba proposta OJE 2020, iha sala plenáriu, sesta (25/09). Imajen Tatoli/António Gonçalves

DILI, 25 setembru 2020 (TATOLI)-Prezidente Autoridade Nasionál Petróleu no Minerál (ANPM), Florentino Mateus Soares Ferreira, deklara sei mantein funsionáriu méritu.

“ANPM hakarak mantein nafatin ninia ema sira ne’ebé maka mai ho méritu, sein haree ba kor polítika tanba instituisaun ne’e estabelesidu ho ninia sistema, entaun ita sei kontinua respeita atubele mantein instituisaun bele funsiona di’ak liután ba oin,” dehan Prezidente ANPM liuhosi audiénsia públika ho komisaun iha sala planáriu, Parlamentu Nasionál (PN), sesta ne’e.

Kestaun ne’e hodi responde ba públiku no deputadu sira relasiona ho informasaun katak direjente ANPM foun hasai funsionáriu ne’ebé maka serbisu kleur iha instituisaun Estadu ne’e.

Deputada Bankada CNRT, Virgínia Ana Belo, nota katak ANPM hanesan instutuisaun ne’ebé Governu investe rekursu umanu barak iha tinan naruk nia-laran.

Reprezentante povu ne’e konsidera investimentu rekursu umanu ba instituisaun ne’e importante tebes no área petrolífera importante atu buka osan atubele reforsa orsamentu Estadu.

“Saida maka ami rona maka membru Governu foun ba troka ema hotu, ema ne’ebé servisu tinan barak no ema ne’ebé iha esperiénsia barak, ema ne’ebé Estadu investe barak ho razaun tanba iha ona vizaun estratéjika foun,” dehan Deputada ne’e.

ANPM iha klasifikasaun estatutu no tuir dekretu-lei ba kriasaun instituisaun ne’e katak maioria funsionáriu sira maihosi selesaun méritu.

Notísia Relevante: Governu Nomea Florentino Ferreira Nu’udar Prezidente Konsellu Diretivu ANPM Foun

“Pozisaun tolu ne’ebé maka pertense ba polítika maka pozisaun ba Prezidente instituisaun, Vise-Prezidente no ami-nia auditoria interna, hosi situasaun ne’e bainhira iha re-estruturasaun ka nomeasaun polítika hosi Ministru Petróleu no Minerál liuhosi desizaun Konsellu Ministru maka re-estruturasaun sei akontese de’it ba Prezidente ANPM maibé Vise-Prezidente sei mantein,” nia garante.

Liga ho diretór, Prezidente ANPM adianta, sei mantein nafatin ne’ebé iha tanba maioria maihosi selesaun pur méritu, tanba ne’e líder instituisaun sira sei hakruuk nafatin ba lei ne’ebé maka kria instituisaun.

ANPM planea halo rekrutamentu profisionál sira seluk no sei tuir polítika ka prosedimentu tomak ne’ebé maka hatuur iha regulamentu interna.

“ANPM kontinua mantein ho objetivu atu fó hanoin hikas fali ita bainhira ita ratifika tratadu delimitasaun fronteira marítima iha tinan kotuk, ami diskute prosesu ida naruk ne’ebé hatuur provizaun relevante iha pakote ne’ebé maka ami halo diskusaun ba negosiasaun naruk ho ita-nia parseiru hanaran estabilizasaun,” nia esplika.

Estabilizasaun sei fó garantia ba empreza sira katak kualkér mudansa sei labele fó risku soberania, tanba ne’e maka ANPM ho ninia natureza hanesan reguladora sei mantein nafatin tranzisaun ida ho orden atu nune’e labele fó impaktu ba indústria petrolífera.

Jornalista: Antónia Gusmão

Editora: Julia Chatarina    

 

HAKEREK NO HATÁN

Please enter your comment!
Please enter your name here