Embaixadór Xina iha Timor-Leste, Xiao Jiagou. Imajen Tatoli/Egas Cristovão

DILI, 24 setembru 2020 (TATOLI)-Embaixadór Xina iha Timor-Leste, Xiao Jiagou, hateten Xina prontu sai parseiru esportasaun produtu Timor-Leste.

Tuir Diplomata xinez ne’e, ho sertifikadu eletrónika orijinál (e-certificate) ne’ebé Timor-Leste lansa ona bele loke espasu ba Governu rua atu halo atividade esportasaun no importasaun ba produtu rai rua.

“Timor-Leste nu’udar nasaun dalimak ne’ebé implementa sistema setifikadu eletróniku orijinál no haree katak kooperasaun nasaun rua ne’e pozitivu tebetebes. Iha futuru sasán Timór ne’ebé maka iha kualidade bele esporta ba Xina,” Embaixadór Xiao Jiagou iha ninia intervesaun iha seremónia lansamentu sertifikadu eletróniku orijinál, ne’ebé hala’o iha edifísiu Ministériu Turizmu, Komérsiu no Indústria, kinta ne’e.  

Diplomata ne’e nota katak Timor-Leste iha produtu orgánika ho kualidade di’ak ne’ebé konsege hatudu ona iha eventu internasionál.

“Timor-Leste iha esperiénsia ona tanba konsege aprezenta produtu iha Expo Sanghai iha tinan hirak liubá hanesan produtu orgániku kafé Luwak no produtu seluk, ne’ebé populasaun Xina koñese ona,” nia haktuir.

Notísia Relevante: MTKI lansa sertifikadu eletróniku orijinál ba atividade esportasaun-importasaun

Embaixadór promete sei serbisu hamutuk ho MTKI no Autoridade Aduaneiru (Alfándega) atu kontrola kualidade produtu Timor-Leste bainhira halo esportasaun ba Xina.

Kooperasaun negósiu entre nasaun rua ne’e sei sai prioridade tanba sasán Xina komesa halo ona importasaun barak mai Timor-Leste, tanba ne’e nia husu presiza kontrola kualidade sasán bainhira halo esportasaun.

“Merkadu Xina boot tebes sei fó oportunidade Timór bainhira halo esportasaun sasán, taxa sei tuun nune’e to’o Xina ho folin baratu,” nia akresenta.

Sistema e-certificate sei fó benefísiu ba Timor-Leste iha futuru ba kestaun esportasaun no importasaun sasán.

“Iha kestaun balun ami sei buka rezolve tanba ita bo’ot sira hatene ita-nia kooperasaun durante ne’e la’o diak to’o oin loron,” Diplomata ne’e fó hanoin.

Iha fatin hanesan, Ministru Turizmu Komérsiu no Industria, José Lucas do Carmo da Silva, hateten implementasaun sistema eletróniku ne’e sei fasilita implementasaun Free Trade Agreement no mós sei hadi’a utilizasaun sertifikadu entre Timor-Leste ho Xina.

Bazeia ba dadus ne’ebé públika iha fórum Macau no mós Custom service, relata katak Timor-Leste ninia relasaun merkadu aumenta oituan ho Governu Xina no komunidade país lian portugés (CPLP, sigla portugés) pur volta millaun 9,913 tranzasaun  komersiál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here