Prezidente Repúblika, Francisco Guterres ‘Lu Olo’. Imajen Tatoli/António Gonçalves

DILI, 24 setembru 2020 (TATOLI)-Prezidente Repúblika (PR), Francisco Guterres ‘Lú Olo’, iha 23 setembru ne’e promulga ona dekretu-lei kona-ba kriasaun Autoridade Nasionál Eletrisidade, Institutu Públiku (ANE, I.P).

Tuir nota ofisiál ne’ebé Agência Tatoli iha kinta ne’e, relata katak ANE iha knaar atu asegura ezekusaun polítika nasionál setór enerjétiku, garante regulasaun no fiskalizasaun produsaun, transporte, distribuisaun, komersializasaun enerjia elétrika iha sistema nasionál eletrisidade, no mós normalizasaun nasionál ba komponente instalasaun elétrika.

Autoridade ne’e sei tutela ba membru Governu ne’ebé responsabiliza ba setór enerjia elétrika no Institutu Públiku ne’e sei diriji superiormente hosi Konsellu Administrasaun ho responsabilidade ba definisaun orientasaun jerál no Konsellu Fiskál ba fiskalizasaun.

Ba ezekusaun jestaun atividade ANE, I.P, sei asegura hosi Diretór Ezekutivu, ne’ebé noemeadu hosi ministru tutela ho proposta hosi Konsellu Administrasaun.

Nota ne’e esplika liután, setór eletrisidade nu’udar pilár ne’ebé fundamentál tebes ba promosaun no dezenvolvimentu ekonomia país no instrumentu privilijiadu ba seguransa no bein-estár populasaun ninian, tanba ne’e konsidera nu’udar servisu públiku esensiál.

Tuir dekretu-lei númeru 13/2003, 24 setembru, ne’ebé estabelese sistema nasionál eletrisidade ko’alia kona-ba prinsípiu báziku no serbisu universál enerjia elétrika ba populasaun no entidade públika no privada ba atividade iha setór oioin.

Estadu Timor-Leste mak ohin loron jere atividade setór enerjia elétrika, iha posibilidade atu estabelese parseria ho setór privadu, espesialmente ba produsaun enerjia elétrika renovável.

Estadu sei kontinua tau-matan ba integridade infraestrutura no viabilidade ba fornesimentu, tanba ne’e, autoridade reguladora sei sai fonte informasaun ba públiku no kualidade setór enerjia hodi kontinua halo fiskalizasaun ba atividades entidade públika no privada ne’ebé opera iha setór ne’e.

Aleinde ne’e, estandarizasaun ba materiál elétriku no instalasaun elétrika sai nu’udar motivu ida hodi kria entidade ne’ebé estabelese norma nasionál sira ba materiál elétriku no ninia utilizasaun no instalasaun hodi promove seguransa ba utilizasaun eletrisidade ba ninia sidadaun sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here