Komandante PNTL Munisípiu Dili, Superintendente Xefe Henrique da Costa no Segundu Komandante PNTL, Superintendente Euclides Belo realiza enkontru ho entidade órgaun komunikasaun sosiál sira iha Timor-Leste hodi hametin kooperasaun servisu. Imajen Tatoli/Eugénio Pereira

DILI, 24 setembru 2020 (TATOLI)- Komandu Polísia Munisípiu Dili, ohin, hala’o enkontru jerál ho xefe redasaun órgaun komunikasaun sosiál sira ne’ebé eziste iha Timor-Leste hodi hametin kooperasaun servisu seguransa atu kontribui informasaun pozitivu hodi  lori sosiedade hametin paz no estabilidade seguransa iha Dili ba too munisípiu sira.

Komandante PNTL Munisípiu Dili, Superintendente Xefe Henrique da Costa no Segundu Komandante PNTL, Superintendente Euclides Belo, konsidera papél mídia importante atu fahe informasaun hodi influensia opiniaun sosiedade hapara violénsia no krime sira hodi hasa’e partisipasaun sosiedade sai nain ba dame.

“Ita nia sorumutuk ne’e ho objetivu rua, primeiru atu kria amizade entre polísia ho mídia sira, segundu hakarak husu apoiu husi mídia sira hodi bele haklaken PNTL nia mehi katak, Dili fatin seguru ba ema hotu,” hateten Superintendente Xefe Henrique da Costa iha ninia diskursu iha ámbitu enkontru ho entidade mídia sira iha Komandu PNTL, Caicoli, Dili.

Komandante PNTL Munisípiu Dili, Superintendente Xefe Henrique da Costa no Segundu Komandante PNTL, Superintendente Euclides Belo realiza enkontru ho entidade órgaun komunikasaun sosiál sira iha Timor-Leste hodi hametin kooperasaun servisu. Imajen Tatoli/Eugénio Pereira

Situasaun seguransa ohin loron iha Dili ezije PNTL atu servisu maka’as tenke envolve ema hotu hodi nia kontribuisaun no mídia ninia papél atu promove paz no estabilidade.

“Ami rekoñese katak, membru PNTL iha Dili ho númeru 500 difisil ba ami atu bele hala’o ami nia knaar hanesan autoridade seguransa ba ita nia povu sira. Tanba ho difikuldade sira ne’e, ami hakarak ema hotu- hotu  ajuda polísia nia servisu hodi atinje mehi ne’ebé ita temi,” Henrique hateten.

Nia hatutan, mídia hanesan fatin informasaun di’ak ba ema hotu bele asesu informasaun, no mídia mós fó influénsia informasaun ba ema hotu liuhosi informasaun ho karater edukativu ne’ebé fó sai. Tanba asuntu seguransa sai preokupasaun ba ema hotu, karik la iha seguransa atividade ekonomia, servisu governasaun no seluk tan labele la’o ho di’ak.

Henrique dehan, dala barak mós PNTL hasoru situasaun real enfrenta difikuldade oin-oin sai hanesan barreira ba PNTL atu hakat ba oin hala’o misaun, no PNTL mós labele subar difikuldade hodi fó sai para buka solusaun hadi’a hamutuk.

“Ami rekoñese katak, iha buat barak PNTL hala’o seidauk loos. Buat hirak ne’e sempre hetan kritika husi ita nia komunidade, maibé kritika ne’e sai hanesan pájina ida ba ami atu hala’o ami nia knaar di’ak liután ba futuru. Ami husu nafatin ita boot mídia sira nian kontribuisaun, liuhusi informasaun ne’ebé publika, atu ita hamutuk dezenvolve paz no estabilidade iha Dili hodi ema hotu hala’o atividade ho di’ak no seguru,” Henrique hateten.

Iha fatin hanesan, Diretora Ezekutivu Agência Tatoli, Rita Almeida, agradese tebes ho kooperasaun servisu ne’e, tanba knaar mídia la’ós atu informa de’it, maibé atu eduka mós sosiedade liuhusi informasaun ne’ebé fó sai atu kontribui ba apoia servisu PNTL no sosiedade lori Dili sai fatin seguru no dame ba sosiedade.

Nia hatutan, mídia mós tenke tau atensaun atu labele fó sai informasaun ho karater krime, maibé tenke fó informasaun pozitivu ne’ebé bele eduka sosiedade nia pensamentu atu kontribui minimiza konflitu sira.

“Ha’u hanoin papél mídia la’ós informa de’it, maibé ita tenke eduka no presiza tau atensaun oinsá eduka ita nia sosiedade hodi partilla informasaun ne’ebé pozitivu, atu ita bele eduka ita nia sosiedade labele moris akompaña de’it notísia sira kona-ba konflitu, maibé fahe informasaun ne’ebé bele eduka sira sai atu hetan solusaun sai husi konflitu ruma,” Rita Almeida hateten.

Rita tatoli tan, bainhira ko’alia kona-ba Dili sai fatin seguru tenke haree mós ba konseitu furak Polisiamentu Komunitáriu presiza polísia ninia prezensa iha povu nia leet maka importante liu polísia bele kria kooperasaun ida di’ak ho sosiedade hodi minimiza kazu krime sira liuhusi knaar Ofisiál Polísia Suku (OPS), Konsellu Polisiamentu Komunitáriu (KPK) no knar Sentru Polisiamentu Movel (SPM).

Iha fatin hanesan, reprezentante Xefe Redasaun RTTL,E,P, Scos Viera dehan, enkontru ne’e importante, tanba atu lori Dili sai fatin seguru ne’e importante, tanba mídia mós hola parte atu kontribui ba paz.

Iha redasaun RTTL mós hari ona Seksaun Kriminál ne’e kada semana sempre fó sai informasaun kona-ba knaar PNTL no halo notísia hodi eduka mós sosiedade atu moris no evita aan husi kualkér konflitu

“Jornalista tenke promove nafatin paz, tanba ami sai mós mediadór atu buka solusaun ba konflitu ruma bele hetan solusaun hodi garante paz iha Dili,” dehan Scos.

RTTL no rasik fó espasu hodi koloka jornalista destakadu iha área defeza no seguransa hodi hala’o knaar la’ós haree de’it ba kestaun seguransa, maibé buka haree mós difikuldade ne’ebé PNTL enfrenta hodi hato’o ba Estadu atu buka solusaun.

Entidade órgaun komunikasaun sosiál sira ne’ebé partisipa iha enkontru ne’e, mak hanesan  Agência Tatoli, RTTL,E,P, GMT-TV, STL-TV, Timor Post, Independente, TV-E, Lafaek News, Naunil, Tempo Timor, Dili Post, The Dili Weekly.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here