Audénsia públika Komisaun E no Governu kona-ba infraestrutura, iha sala plenáriu, kinta (24/09). Imajen Tatoli/Egas Cristovao

DILI, 24 setembru 2020 (TATOLI)Iha proposta Orsamentu Jerál Estadu (OJE) ba tinan fiskál 2020, Ministériu Obra Públika (MOP) prevee $195.423.435.

Ministru Obra Públika, Salvador Eugênio Soares dos Reis Pires, informa hosi totál orsamentu MOP nian, porsentu 83 foku ba eletrisidade hanesan manutensaun ba jeradór no fornesementu kombustível ba sentrál elétrika Hera no Betano.

“Porsentu 83 orsamentu ne’e, previzaun ba fornesementu mina iha sentrál elétrika, manutensaun jeradór no mós manutensaun ba liña transmisaun,” relata Ministru Salvador, iha ámbitu audiénsia públika ba proposta OJE 2020 ho komisaun E ne’ebé trata asuntu infraestrutura, iha sala plenáriu, Parlamentu Nasionál, kinta ne’e.

Tuir Ministru, restu osan ne’e sei haree ba projetu infraestrutura ein kursu hanesan estrada, bee no mós projetu sira seluk.

“Orsamentu seluk atu haree ba projetu infraestrutura sira ein kursu, ne’ebé selu ona hahú fulan-agostu ba oin no gastu ne’ebé iha rejime doudesimál tenke re-orsamenta atu kontabilidade hafoin OJE la’o normál automátikamente hetan redusaun, ne’ebé tenke halo kontabilidade hafoin gastu uluk hamutuk millaun $71 no hosi agustu to’o dezembru 2020 ami koloka restante bainhira orsamentu ne’e promulgadu maka bele uza atu selu obrigasaun ne’ebé tama ona iha kontratu,” nia esplika.

MOP la prevee inisiativa foun iha 2020 tanba tempu ne’ebé mak iha fulan ida ho balun de’it atu ezekuta osan.

Totál orsamentu ba MOP iha tinan ne’e maka $195.423.435, fahe ba kategoria hanesan saláriu no vensimentu $5.022.471, bens no servisu $182.877.129, kapitál menór $2.523.835, kapitál dezenvolvimentu $5.000.000, no laiha transferénsia públika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here