Ministru Administrasaun Estatal (MAE), Miguel Pereira de Carvalho . Imajen/Media MAE.

DILI, 24 setembru 2020 (TATOLI)—Ministériu Administrasaun Estatal (MAE) lideradu Miguel Pereira de Carvalho sei la selu dívida ne’ebé laiha kontratu iha tinan 2019 nian.

Notísia Relevante: Semana oin, administradór no prezidente autoridade sei tuir ezame

“Dívida iha tanba rai hela despeza sira dezde 2019 entaun membru Governu ne’ebé foin asume pasta iha fulan-maiu tinan ida-ne’e, tenke garante dívida sira-ne’ebé iha maibé dívida sira-ne’ebé iha kontratu ita bele halo pagamentu, dívida sira-ne’ebé laiha kontratu ne’e “ilegál” labele halo pagamentu. Dívida ne’e besik $200 mill,” Ministru Administrasaun Estatal, Miguel Pereira de Carvalho, informa ba jornalista sira, hafoin hala’o audiénsia públika ho Komisaun A (Justisa no Konstitusionál), iha Parlamentu Nasionál, kinta ne’e.

Ministru Administrasaun Estatal ne’e esplika klaru dívida ne’e maibé fó-sai de’it katak dívida ne’ebé maioria iha duni kontratu maibé balun laiha kontrattu.

“Dívida ne’e bele iha tanba ne’e kestaun planu aprovizionamentu ne’ebé mak la loos. Bainhira ita planu aprovizionamentu tenke define prazu ezekusaun, prazu konkursu no mós prazu atu asina kontratu. Ne’e fásil ba ita atu konklui obra sira dentru tinan fiskál ida,” Miguel Pereira de Carvalho hateten.

Governante ne’e fó ezemplu, atu evita labele iha dívida entaun bainhira asina iha marsu nia laran entaun ne’e fásil ba ezekusaun durante períodu hahú hosi abríl to’o dezembru iha tinan fiskál ida.

“Agora se kontratu ida asina iha outubru nian, konserteza ninia ezekusaun labele konklui dezembru entaun ninia despeza sira tenke tranzita ba tinan fiskál tuir mai. Ida-ne’e mak bainbain kria dívida sira-ne’e,” nia dehan. 

Maske nune’e, governante ne’e dehan, solusaun mak Governu iha obrigasaun kontratuál ho setór privadu sira tenke iha komitmentu para atu fó solusaun, katak tenke tau orsamentu bainhira aprova hosi Parlamentu Nasionál maibé tenke iha kontratu.

Ministru Administrasaun Estatal ne’e hateten, orsamentu 2020 nian ho montante $14,729,411 ne’e sufisiente hodi halo pagamentu ba dívida sira-ne’ebé iha kontratu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here