IPG no Kompañia Schlumberger asina “Master Service Agreement”, iha edifísiu IPG, Comoro, kinta (24/09). Imajen Tatoli/Egas Cristovão

DILI, 24 setembru 2020 (TATOLI)-Kompañia australiana, Service Company Schlumberger hamutuk ho Instituto do Petróleo e Geologia (IPG) asina “Master Service Agreement” no iha tempu hanesan kompañia oferese software gratuita hodi prosesa dadus estudu jeolojia ne’ebé institutu ne’e halo ona.

Prezidente IPG, Gabriel Gaspar Aparício de Oliveira, hateten akordu entre parte rua ne’e atu fó doasaun software ho kualidade aas ne’ebé bele prosesa dadus sízmika no dadus ne’ebé halo estudu hodi buka petróleu no gás.

“Ho sofware ne’e, ita bele halo analiza oinsá maka buka petróleu iha rai-maran no  tasi laran,” tenik Prezidente IPG iha edifísiu Delta 1, Elemloi Comoro, kinta ne’e.

Notísia Relevante: Prezidente IPG foun kompromete halo peskiza ba kualidade bee-moos

ANPM Halo Promosaun Konkursu Públiku Mina no Gás Iha Bloku 18 Liuhosi Konferénsia Online

Dirijente ne’e dehan, dadus hosi Autoridade Nasionál Petróleu no Minerál (ANPM) no Geoscience Australia sei kompila atu halo studu filafali atu buka poténsia petróleu ho programa informátika ne’e.

Prezidente IPG, Gabriel Gaspar Aparício de Oliveira. Imajen Tatoli/Egas Cristovão

“Ida ne’e parte inisíu ida atu ita halo estudu kle’an ba ita-nia petróleu no gás,” nia akresenta.

Durante ne’e IPG halo ­estudu fatuk ne’ebé bele prodús no akumula mina, maibé atu hatene poténsia sira tenke tuir estudu geo fízika no entrepreta dadus sira, no halo analiza detallu ho programa ne’e.

“Durante ne’e IPG laiha software ne’e no agora mak hetan doasaun, tanba ne’e foin ba dahuluk maka iha. Akordu ne’e ba tinan ida, hafoin ba tinan ida sei prolonga tan,” nia esplika.

Foin lalais ne’e ANPM halo promosaun ba bloku 18, kompostu hosi hitu iha rai maran no 11 tasi laran, enkuantu IPG halo peskiza no estudu ba potensialidade rekursu minerál.

Iha fatin hanesan, Prezidente ANPM, Florentino Mateus Soares Ferreira, hateten ANPM, IPG no Timor GAP hanesan instituisaun autonómu ne’ebé maka tutela ba Ministériu Petróleu no Minerál (NPM), tanba ne’e presiza iha koordenasaun servisu ida.

Prezidente ANPM, Florentino Mateus Soares Ferreira. Imajen Tatoli/Egas Cristovão

“Saida maka ohin IPG atinje hanesan alkasu boot tebes no loke dalan atu uza software halo estudu no peskiza detallu liután ba petroliu no gás,” dehan Prezidente ANPM.

Tanba ne’e, nia iha esperansa programa ne’e bele ajuda serbisu IPG sai di’ak liután.

“Espera ba oin IPG bele fó rezultadu estudu ne’ebé di’ak liu ba ministériu no mós ba instituisaun sira seluk hanesan ANPN mo Timor GAP,” nia akresenta.

Seremónia doasaun ne’e akompaña hosi jerente Kompañia Schlumberger liuhosi vídio konferénsia.

Marka presenza iha asina akordu  ne’e reprezentante Service Company  iha Timor- Leste, Prezidente ANPM, repsentante Prezidente Timor GAP no reprezentante MPM.

Entretantu, orsamentu IPG ba tinan 2021 prevee $360.000, ne’ebé ho prioridade atu haree ba kualidade bee iha rai-okos, estudu petroleu no rekursu minerál, risku jeolojiku, jeotékniku no mapamentu jeotékniku.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here