Audisaun públika komisaun C no E ho Governu ba proposta OJE 2020 iha área infraestrutura, iha sala plenáriu, kinta (24/09). Imajen Tatoli/Egas Cristovão

DILI, 24 setembru 2020 (TATOLI)-Vise Primeiru-Ministru no Ministru Planu no Ordenamentu, José dos Reis, hateten Konsellu Administrasaun Fundu Infraestrutura (KAFI) foti ona desizaun hodi husu pareser legál hosi Ministériu Públiku (MP) molok halo pagamentu ba projetu emerjénsia.

“Reuniaun KAFI  kona-ba projetu 44 la’ós lori ba KAFI atu halo konkursu maibé foin lalais lori atu ami foti desizaun atubele husu pareser legál no haree katak projetu sira ne’e balun iha duni progresu maibé balun foin atinje persentajen 50 to’o 70 no balun porsentu 100,” relata Ministru José Reis iha ámbitu audisaun públika komisaun C ne’ebé trata finansa públika no E ne’ebé trata asuntu infraestrutura, iha sala plenáriu Parlamentu Nasionál (PN), kinta ne’e.

Projetu emerjénsia ho totál 44 maka seidauk iha kontratu, tanba ne’e sei iha problema ho pagamentu.

“Presiza iha pareser legál atubele foti desizaun polítika bazeia ba forsa legál ida atubele halo pagamentu ba projetu sira ein progresu, tanba entre 44 ne’e parese projetu 20 maka la hatene loloos ninia progresu,” nia esplika.

Notísia Relevante: KAFI deside la orsamenta projetu emerjénsia laiha kontratu iha OJE 2020

Iha fatin hanesan, Ministru Obra Públika, Salvador Eugênio Soares dos Reis Pires, hateten KAFI hasai tiha ona desizaun atu husu pareser legál hosi MP atu fasilita Governu halo desizaun polítika ruma.

“Iha orsamentu 2018, ami tenta legaliza atu ajuda rezolve problema. Ha’u rasik ho diresaun jerál obra públika orienta sira atu husu Sekretariadu Grade Projetu fundamenta bazeia ba lei aprovizionamentu tuir rekomendasaun Tribunál Konta artigu 92 no 94, katak projetu sira ne’e emerjénsia duni,” nia akresenta.

Governante ne’e dehan, iha tempu ne’ebá ninia kondisaun iha risku no saúde públiku maibé infelizmente  ami lahetan fundamentasaun atu fó desizaun atu halo kontratu, tanba ne’e maka iha tempu ne’ebá iha Komisaun Inkéritu Parlamentár (KIP) no sira seluk ajuda halo desizaun polítika ida ba iha problema projetu emerjénsia.

Iha tinan 2018 to’o 2019, Governu liuhosi Ministériu Obra Públika (MOP) halo ona pagamentu projetu hamutuk pakote 94 ho kustu $11.295.645,69 (porsentu 46,50) hosi totál orsamentu iha kontratu ho kustu $245.811.682, ne’ebé kompostu hosi projetu estrada 72, kontrolu cheia ka barrajen iha mota hamutuk 22 no projetu ponte haat.

Hosi totál projetu 142, ida iha kontratu hamutuk 98, maibé projetu estrada tolu maka seidauk hatama ba kontratu, tanba ne’e projetu estrada ne’ebé halo ona pagamentu hamutuk 69, kompostu hosi barrajen hamutuk 22 no ponte tolu tanba ponte ida muda ona kontratu, nune’e totál pagamentu projetu hamutuk 94.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here