Ministru Administrasaun Estatál, Miguel Pereira de Carvalho. Imajen Tatoli/Egas Cristóvão

DILI, 24 setembru 2020 (TATOLI)—Governu liuhosi Ministériu Administrasaun Estatal (MAE) iha kompromisu boot apoia Arkivu no Muzeu Rezisténsia Timorense (AMRT) hodi kontinua pezerva dokumentu istóriku sira.

Notísia Relevante: MAE sei transfere orsamentu ba PNDS iha novembru-dezembru

AMRT hanesan organizasaun estadu nian ne’ebé tutela iha Minstériu Administrasaun Estatál (STAE) ho nia misaun prinsipál atu prezerva dokumentu istóriku sira.

Ministru Administrasaun Estatal, Miguel Pereira de Carvalho, esplika prezervasaun ba dokumentu sira tantu okupasaun Governu portugés no tempu indonézia nian no mós iha prosesu restaura independénsia.

“Ita sei kontinua halo nafatin hodi prezerva dokumentu sira ne’e. Minstériu Administrasaun Estatál (STAE) ho kompromisu boot para atu-bele kapasita instituisaun ida-ne’e atu fornese fasilitadade sira-ne’ebé sufisiente tantu edifísiu, rekursu finanseira, nune’e instituisaun ne’e bele dezempeña funsaun ho di’ak liután,” nia informa ba jornalista sira hafoin audiénsia públika kona-ba proposta orsamentu 2020, iha Parlamentu Nasionál, kinta ne’e.

Governante ne’e realsa, oras ne’e dokumentu istóriku iha AMRT barak tebes, ema hotu-hotu bele haree sira-nia dadus iha-ne’ebá, até dadus sira tempu portugés mós sei eziste iha arkivu nasionál.

“Fatin ida-ne’e mós sai sentru peskiza ba públiku bainhira hakarak konsulta dokumentu sira,” governante ne’e informa.

Tuir dokumentu ne’ebé deskreve Planu Asaun Anuál (livru 2) refere programa ho kódigu 518 kona-ba dezenvolvimentu suku sira no retornu ekonómiku bázika ho orsamentu $7,393,697 komposta hosi saláriu no vensimentu $202,362 no transferénsia públika $7,191,335.

Minstériu Administrasaun Estatál (STAE) tau ona iha programa ho kódigu 513 kona-ba prezervasaun no konservasaun ba dokumentu valór istóriku sira ho totál orsamentu $43,094. Hosi orsamentu $43,084 ne’e, Mininstériu Administrasaun Estatál (STAE) prevee iha bens (sasán) no servisu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here