Ministru Turizmu Komérsiu no Indústria, José Lucas do Carmo da Silva. Imajen Tatoli/Egas Cristovão

DILI, 24 setembru 2020 (TATOLI)-Ministru Turizmu Komérsiu no Indústria, José Lucas do Carmo da Silva, konsidera ho ezisténsia sertifikadu eletrónika orjinál (e-certificate) bele fó oportunidade ba emprezáriu timor-oan sira hodi hala’o atividade negósiu iha zona Ázia Pasíku no Uniaun Europeia (UE) liuhosi Free Trade Agreement (FTA) ne’ebé maka antes ne’e Timor-Leste opta.

“Lansamentu e-certificate sei haforsa meta jerál no nu’udar fasilidade halo negósiu iha enkuadramentu Ásia Pasífiku no Uniaun Europeia,” dehan Ministru Turizmu José Lucas, iha seremónia lansamentu iha edifísiu Ministériu Turizmu Komérsiu no Indústria (MTKI), Mandarin, kinta ne’e.

Notísia Relevante: MTKI lansa sertifikadu eletróniku orijinál ba atividade esportasaun-importasaun

Tuir governante ne’e, sertifikadu ne’e rasik sei util ba relasaun esportasaun no importasaun Timor-Leste nia.

Maski nune’e, presiza asegura lejitimidade dezenvolvimentu negósiu, kresimentu ekonómiku no protesaun ba entidade ne’ebé envolve iha atividade negósiu.

“Iha era ka períodu dijitál hanesan agora, presiza tebes buka meiu atubele akomoda interese autór sira ne’ebé halo negósiu, ho nune’e bele fasilita sira kompete iha merkadu rejionál no internasionál,” membru ezekutivu ne’e subliña.

Tanba ne’e, MTKI planeia atu kria atendimentu públiku ne’ebé ho lalais, fásil no transparante.

“Pasu ida ne’e maka ministériu foti atu dezenvolve sertifikadu orijinál ho sistema dijitál,” nia akresenta.

Sertifikadu ho forma eletóniku ne’e sei akumula dadus orijen iha Timór ho nível rejionál ho internasionál, ein termu halo negósiu.

“Medida estratéjiku ne’e ita opta atu hasa’e kompatibilidade merkadu iha nível rejionál no internasionál, nune’e bele dudu Timor-Leste adopta prátika negósiu inovativu no enkoraja fasilidade negósiu ho padraun ne’ebé adopta iha nível rejionál no internasionál,” tenik Ministru.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here