Padre Vigáriu Segundu Igreja Parókia Balide, Dili, Arnaldo Soares Pereira Babo. Imajen/foti husi Facebook

DILI, 24 setembru 2020 (TATOLI)- Padre Vigáriu Segundu Igreja Parókia Balide, Dili, Arnaldo Soares Pereira Babo,  ohin dadeer, mate derrepente ho kondisaun tuur iha kadeira iha rezidénsia  padre sira nian iha Balide, Dili.

Informasaun preliminariu ne’ebé Ajénsia Tatoli rekolla husi fonte oioin no sasin sira balun iha lokál akontesimentu katak, Amu Vigáriu Arnaldo sofre korasaun. Tanba iha dadeer ne’e nia hadeer husi nia toba fatin ho kondisaun di’ak hela no sei tuur iha ninia meza komputadór oin hala’o servisu balun.

Akontesimentu ne’e halo Bispu Dioseze Dili, Mgr. Virgílio do Carmo da Silva, SDB, ho nai-lulik no madre, inklui sarani sira hafodak hodi kontaktu kedas autoridade Polísia Forensik Investigasaun Kriminál no doutór espesialista Ospitál Nasionál Guido Valadares (HNGV) too kedas iha fatin hodi halo investigasaun.

Amu Bispu Dioseze Dili ne’ebé hakat too lokál akontesimentu espresa nia sentimentu triste tebes bainhira rona no haree  Amu Arnaldo Soares Pereira Babo, ne’ebé la iha ona iis no tuur hela iha kadeira laran.

Bispu Dioseze Dili, Don Virgilio autoriza kedas autoridade Polísia no médiku atu halo teste médiku hodi justifika matebian nia mate ne’ebé deskonfia sofre korasaun.

“Igreja entrega ba PSIK, no doutór sira husi ospitál mai ona sira hala’o tuir hotu regra  ne’ebé tuir lei ninian ba akontesimentu hanesan ne’e. Depois estudu, doutór sira deklara katak, la iha agresaun fíziku ida ne’ebé envolve lori ba iha Padre Arnaldo ninia mate. Sira haree hotu ona sinál deskonfia raan sai husi nia-liman, buat sira ne’e hotu, tanba nia tuur demais maka raan maka sulin, entaun nu’udar família ita simu ida ne’e, tanba dehan mate ne’e kauza mai husi ninia fuan,” hateten  Bispu Virgilio do Carmo da Silva, SDB ba jornalista iha rezidénsia Padre Igreja Balide, Dili.

Bispu hato’o agradese ba médiku no doutór espesialista sira ne’ebé halo ona esforsu maka’as haree kondisaun nai lulik ne’e ninia mate.

Parte Igreja Katóliku sei koordena ho família sira sei selebra misa no serimónia rituál importante hodi bele hala’o serimónia funerál ne’ebé tuir planu sei hala’o sesta loro-kraik (25/09).

“Agora ita entrega ba Parókia Balide hodi halo preparasaun. Tuir planu aban tuku 11: 00 Otl, ita halo misa funerál hodi lokraik ba hakoi,” hateten Bispu Virgilio do Carmo da Silva.

Bispu mós husu ba sarani hotu-hotu atu tuur hamutuk hodi reza hasa’e orasaun no agradese ba Nai Maromak hodi simu nai-lulik  ne’e iha Nia Kadunan Santu.

Matebian nu’udar oan daruak husi maun-alin hamutuk na’in-ualu (8), moris  Suku Aufu, Postu Administrativu Letefoho, Munisípiu Ermera, iha loron 4 abríl 1975, nu’udar oan husi  Januário Babo ho Lúcia Soares.

Tuir observasaun Agência Tatoli, daudaun ne’e parte família husi amu matebian nian iha Ermera too ona iha Igreja  Balide, inklui sarani barak hahú hala’o vizita no halo orasaun iha Igreja Balide.

Iha parte seluk, Komandante PNTL Munisípiu Dili, Superintendente Xefe, Henrique da Costa seidauk bele fó sai kauza husi saserdote ne’e nia mate, tanba tenke hela relatóriu investigasaun no prosesu autópsia husi ekipa forensik PNTL no Ospitál Nasionál Guido Valadares.

 Jornalista      : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here