Ahi-han karreta Estadu ida iha estrada area Liuk-Merah, Suku Fatisi, Postu Administrativu Laulara, Munisípiu Aileu. Imajen/foti husi Facebook

DILI, 24 setembru 2020 (TATOLI)- Karreta Estadu foun ida husi Ministériu Finansas ho marka Rush kór mutin xapa partíkula 04976 G, ohin,  ahi-han derrepente de’it iha estrada  area Liuk-Merah, Suku Fatisi, Postu Administrativu Laulara, Munisípiu Aileu.

Insidente inséndiu ne’e akontese iha tuku 13:30 Otl, bainhira Diretór Nasionál ba Manejamentu Efetivu no Mobilizasaun Asisténsia Ministériu Finansas, Elson Martinho da Costa, ho ekipa  hala’o viajen servisu atu ba partisipa serimónia ida iha Suku Seloi-Kraik, Aileu nian.

Portavós Polisia Nasionál Timor-Leste (PNTL), Superintendente Xefe, Arnaldo de Araújo, hateten, parte Servisu Investigasaun PNTL Aileu sei hala’o hela investigasaun no deskonfia kauza ahi-han karreta Estadu ne’e  tanba radiator bee karreta nian maka maran no manas hodi rebenta.

“Loos duni, ahi han duni karreta Estadu ida, ita nia polísia Aileu sei halo hela investigasaun hodi hatene motivu loloos ne’e saida, maibé sira deskonfia bee radiator maka maran,” dehan portavós PNTL, Arnaldo de Araújo  ba Agência Tatoli via telefone.

Nia dehan, parte PNTL mós koordena ona ho Diretór Finansas ne’ebé lori karreta hodi fó informasaun kona-ba kronolojia akontesimentu ne’e.

Akontesimentu ne’e la rezulta ema ruma kanek, maibé karreta kondisaun para hela iha estrada laran ahi han too motuk.

Jornalista       : Eugénio Pereira

Editór             : Francisco Simões

1 KOMENTÁRIU

  1. Lori kareta la hare Nia kondisaun uluk nee… Kontrola bateria Nia ulun, be radiador, roda, oli nee tuir lolos sufer Nia servisu prinsipal molok Nia halao viajem… Labele uja deit…trata kareta estadu nian hanesan Ita nian rasik

HAKEREK NO HATÁN

Please enter your comment!
Please enter your name here