UPM halo patrullamentu iha tasi. Imajen/Google

DILI, 23 setembru 2020 (TATOLI)- Komandu Polísia Nasionál Timor-Leste, Unidade Polísia Marítima (UPM) Postu Pelotaun Bravo Atabae-Bobonaro, detein Timor-oan na’in-ida ho Indonéziu (WNI/Warga Negara Indonesia) na’in-rua ne’ebé halo atividade tranzasaun fa’an mina ilegál.

Komandante UPM Postu Pelotaun Bravo Atabae-Bobonaro, Inspetór Xefe Pedro da Cruz, informa, ema sira ne’ebé detein hanesan, Tomas Pereira, Mateus Magno  nu’udar sidadaun Indonézia no Timor-oan ida maka António dos Reis nu’udar negosiante husi Palaka.

UPM deteta sira nia paradeiru ho ró ki’ik ida tula mina jerigen litru 20 hamutuk 44 hala’o hela tranzasaun iha tasi ibun área Bee Malae, Suku Saniri, Postu Administrativu Atabae, Munisípiu Bobonaro, iha segunda (21/09/2020) tuku 02:00 madrugada.

Hafoin halo detensaun no investigasaun, UPM halo kedas apreensaun ba sasán evidénsia sira hanesan ró ida, osan $490 inklui mina ilegál masa litru 20 hamutuk 44.

“Ami simu informasaun husi komunidade katak, sira atu halo atividade tranzasaun mina ilegál. Ami konsege deteta sira too tuku  02:00 madrugada,  kaptura sidadaun Indonézia na’in-rua husi Motain-Atambua sira lori mina ho ita nia Timor-oan ida ne’ebé ita kaptura sira ho ró no osan $490,”  informa Inspetór Xefe, Pedro da Cruz ba jornalista, ohin, via telefone.

Inspetór Xefe, Pedro da Cruz dehan, daudaun ne’e autór sira inklui sasán sira entrega ona ba Komandu PNTL Bobonaro hodi halo prosesu investigasaun hodi aprezenta ba Ministériu Públiku.

Iha parte seluk, Inspetór Xefe, Pedro hato’o agradese ba komunidade Atabae ne’ebé fó apoiu ró hodi ajuda tula membru UPM hodi operasaun.

Dezafiu servisu ne’ebé UPM Postu Pelotaun Bravo Atabae enfrenta maka menus transporte ró no lojístika hodi halo operasaun. Tanba ró ki’ik ne’ebé UPM iha aat hotu ona.

Oras ne’e daudaun membru UPM ne’ebé destaka iha postu ne’e hamutuk ema na’in 22-liu maka halo hela atividade servisu kontrola husi Tasi Liquiça ba too Batugade.

Mezmu UPM enfrenta difikuldade, maibé sira kontinua halo servisu másimu hodi prevene no kombate krime tráfiku droga, tráfiku umanu, terrorizmu, piratarias, imigrasaun klandestina no poluisaun marítima.

Unidade Marítima nu’udar parte ida husi Sistema Autoridade Marítima no estabelese ona espesífikamente atu fó vijilánsia no monitoriza área tasi-ibun no tasi sira estadu nian tuir Lei Orgánika PNTL, Dekretu-Lei 9/2009, Artigu 32(1).

Misaun ida ne’ebé inklui iha kuadru autoridade marítima mak: Atu salvaguarda ema nia moris iha tasi no atu fornese servisu salva marítimu nian (Artigu 32 (2) (f).

Totál membru UPM efetivu na’in 120, hodi fahe ba área tolu, mak hanesan

servisu iha postu (Postu Batugade, Atabae, Atauro, Beloi, portaun portu Dili, Sional Dili no postu Com, Lospalos), servisu iha ró (ró NRTL Lusitania, NRTL Dili, NRTL Hera, NV Timor-Leste, speed boat 12), no servisu iha kuartél UPM.

 Jornalista      : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here