Ilustrasaun torre eletrisidade. Imajen/Espesiál

LAUTÉM, 23 setembru 2020 (TATOLI)-Uma-kain hamutuk 60-resin iha suku Caenlio, postu administrativu Iliomar, munisípiu Lautém maka seidauk asesu ba eletrisidade.

“Caenlio ne’e kompostu hosi aldeia lima, maibé aldeia Larimi de’it maka seidauk asesu eletrisidade, ho totál uma-kain hamutuk 60-resin,” dehan Xefe suku Caenlio, Julião Soares ba Agência Tatoli, iha suku Caenlio, kuarta ne’e.

Maski nune’e, líder komunitáriu ne’e iha esperansa Governu sei tau iha planu no prioridade kona-ba kestaun eletrisidade.

“Ami-nia proposta kona-ba liña eletrisidade mós aprezenta bebeik ona ba autoridade kompetente sira, maibé seidauk iha resposta,” nia akresenta.

Notísia Relevante: Suku 77 Seidauk Asesu Eletrisidade, Tinan Oin MOP Implementa Pakote 33 ba Faze Dahuluk

Julião Soares preokupa mós to’o agora aldeia Larimi seidauk iha klínika.

“Kuandu estrada ne’e di’ak, ha’u fiar katak sentru saúde Iliomar sei bele halo tratamentu di’ak iha komunidade iha aldeia Larimi,” nia tenik.

Suku Caenlio iha aldeia lima kompostu hosi Caidawalarin, Larimi, Liufalun, Maluira, no Titiwen, ho totál populasaun hamutuk 2.067. 

Ministériu Obra Públika (MOP) identifika ona daudaun iha suku hamutuk 77 iha territóriu tomak  maka seidauk asesu ba eletrisidade durante tinan barak nia laran, tanba ne’e MOP tau ona ba planu prioridade iha tinan 2021 hodi implementa pakote balun iha faze dahuluk.

Hosi totál suku ne’ebé seidauk asesu ba eletrisidade, pakote 33 maka iha ona ninia dezeñu no Bill of Quantity (BoQ), tanba ne’e Governu iha planu atu implementa pakote ne’e uluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here