Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 23 setembru 2020 (TATOLI)-Iha proposta Orsamentu Jerál Estadu (OJE) tinan fiskál  2020  nian, Tribunál Rekursu (TR) husu tan osan adisionál   millaun $1 atu  korresponde ba nesesidade servisu rutina Tribunál nian, pratikamente atu selu  de’it  retroativa ba juis, ofisial justisa no funsionáriu sira hetan sira nia direitu tanba Estadu atribui sira  hetan  promosaun hodi aumenta eskalaun no klase.

“Total orsamentu  ne’ebé Governu atribui ba Tribunál hamutuk millaun $3-resin, entaun ami halo pedidu adisionál millaun $1,” hateten Prezidente Tribunál Rekursu (PTR), Deolindo dos Santos, ba Agência Tatoli, ohin, bainhira hala’o audiénsia públika ho Komisaun A Parlamentu Nasional kona-ba proposta OJE 2020 iha Parlamentu Nasionál.

Tribunais hanesan  órgaun soberania ho nia kompeténsia  atu administra justisa lori povu nia naran no  hala’o ezersísiu nia funsaun, Tribunais sira iha direitu koadjuvasaun husi autoridade seluk.

Desizaun husi tribunais sira hanesan kumprimentu obrigatóriu  no  prevalese kona-ba desizaun hotu autoridade nian, ne’ebé  previstu no eziste (a) Supremu Tribunál Justisa no tribunais judisiais sira seluk, (b)Tribunál Superior Administrativu Fiskál no  Kontas  no Tribunais Administrativu Primeira Instánsia no  (c) Tribunais Militares (artigu 118 konstituisaun Repúblika). Ho nune’e ,  Tribunál Rekursu  ho Tribunais Distritais  ezerse kompeténsia ba  Tribunais sira ne’ebé kria.

Proposta OJE 2020 hosi Tribunál Rekursu (TR) hamutuk millaun  $4,925,292  kompostu saláriu no vensimentu $2.941,021, bens servisu $1.984,271 ba kapitál menór, kapitál dezenvolvimentu no transferénsia públika laiha (0).

Husi orsamentu millaun $,4,925,292 koloka ba   Konsellu Superior Majistratura Judisiál $11.000, Tribunál Rekursu iha  saláriu vensimentu  $1,813,914, bens servisu $ 1,810,914, Tribunais Distritais saláriu vensimentu $1,127,097 no bens servisu $162,357.

Deolindo dos Santos, informa, kona-ba Dotasaun Orsamentu Temporáriu (DOT) hosi janeiru  to’o mai agora liu husi ninia ezekusaun TR rasik la’o ho di’ak.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here