Tiago Guerra no nia kaben Chan Fong Fong Guerra. Imajen/Espesiál

DILI, 23 setembru 2020 (TATOLI)-Tribunál Distritál Dili (TDD), ohin, hala’o  fali julgamentu ba arguidu na’in-tolu ho inisiál DDJ, MTSF, NESF ne’ebé deskonfia fasilita kazál Portuguesa; Tiago Guerra ho Chang Fong – Fong Guerra,  halai sai  husi territóriu Timor-Leste iha 2017.

Notísia Relevante : Portugés Komete Krime Iha TL, Ikus Mai Halai Lakon

Iha  akuzasaun Ministériu Públiku nian iha indísiu katak arguidu NESF  nu’udar diretór ba kompañia Corais  ho kapitál  90% nain ba roo peska la’ós komersiál ho tipu  Glass kór mutin  no sinál identifikasaun embarkasaun BOUNTY LNCDMR 32 71.

Arguidu DDJ hanesan sósiu iha kompañia  Corsis Timor  Lda ho kapitál 10%, aumesmu tempu hanesan mós kapitaun ba ró peska la’ós komersiál ho tipu Glass  kór mutin  BOUNTY LNCDMR 32 TL ( 1167 so’e 1174).

Arguidu MTSF  hanesan kapitaun ba ró peska la’ós mós komersiál ho tipu Glass, kór mutin, BOUNTY LNCDMR 32 TL, 1167 4 4

Iha loron 19 fulan abríl tinan 2017, arguidu NESF  rekere ba iha servisu tékniku iha area Konformidade Diresaun Jerál Alfándega hodi importa mai Darwin- Australia mai Timor Leste, ró Bounty ho mercury 90 PK, kór mutin ne’ebé sosa ho folin $6.182.90  no selu impostu ho valor $19,620.100.

Notísia Relevante : AJAR Konsidera Kazu Tiago Guerra ho Chang Fong Sériu

Iha fulan juñu  2017, arguidu NESF hato’o pedidu lisensa ba atividade peska la’ós komersiál no iha loron 5 agostu tinan hanesan, Diresaun Naisonál Inspesaun Peska halo inspesaun ba roo refere bazeia ba pedidu arguidu NESF, atu hala’o atividade peska desportiva, Peska momentu ne’ebá Diresaun Nasionál Inspesaun Peska halo markasaun ba peska la’ós komersiál, hafoin kompañia bele hetan lisensa hodi hala’o peska desportiva.

Iha  loron 24 agostu 2017, arguidu NESF selu tarefa ba lisensa peska  iha  banku BNU ho valor  $3,050.00. Roo refere foin maka hala’o atividade hahú husi loron 24  agostu tinan 2017, maibé arguidu NESF fan fali ba Tiago Guerra iha loron 6 outubru  2017, roo refere apenas hala’o atividade durante fulan balun no iha  loron 02 no 04  novembru 2017, tuku 20:02 no 12:07, arguidu NESF, halo kontaktu através SMS ba 70006 deskonfia Tiago Guerre, hodi kontrata kona ba sosa no fan roo.

Notísia Relevante : Tiago Tenke Lori Mai TL No Investiga Embaixada Portugal Iha Dili

Iha loron 05 novembru 2017, kalan, depois de selebrasaun kontratu fan no sosa roo feschaga Pagen arguidu NMTSF   no DDJ hanesan kapitaun ba roo hodi hamutuk ho arguidu NESF hodi futu lia hamutuk hodi transporta roo ba Munisípiu Same-Betano.

Iha loron 06 novembru 2017, tuku  09.40 arguidu NSF lori osan husi rezultadu fan roo ho montante $16,000.00 ba depozita iha BNU.

Iha loron 06 novembru 2017, putvolta tuku 12:00, DDJ ho MT hamutuk tan ho ema ida sira transporta roo  husi Dili ba Betano to’o iha Same purvolta tuku 18:30, hafoin sira toba iha hotel Braia, pertense ba sidadaun Australianu iha area Nularan – Same Vila.

Iha loron 06   novembru 2017, Tiago Guerra ho Chang Fong-Fong Guerra arranka husi Dili ba Manufahi no iha loron 07 novembru, purvolta  tuku 03:50 madrugada, arguidu MT  ho DDJ sai husi hotel Nularan – Same Vila, ba tasi ibun Waidabere- Same.

To’o iha tasi ibun Wadubere – Same, arguidu DDJ hakiduk karreta ne’ebé nia kondús hodi transporta roo ne’e tama ba iha tasi laran no arguidu DDJ foti pilox kor metan hodi apaga roo  nia naran no númeru matrikula.

Lakleur Tiago Guerra ho Chang Fong – Fong Guerra mai husi tasi ninin hodi lao ba diresaun roo para hodi sa’e kedan ba iha roo laran, no arguidu DDJ hodi hakiduk tan karreta tama ba tasi laran no ema na’in-rua seluk kore tali hodi dudu roo refere tama ba iha tasi laran.

Tiago Guerra ho Chang Fong – Fong Guerra imediatu hamoris roo hodi arranka kedan no liatun hela ba timor oan seluk hatete katak “ami ba sei la fila ona”,

 Arguidu DDJ kondús mesak karreta ne’ebé dada troli hodi lao uluk, hafoin arguidu MT tula ho timor-oan ne’e hamutuk ho nia karreta ne’ebé nia kondus hodi tuir arguidu .

Arguidu nain-tolu hatene di’ak katak atu sai ba nasaun seluk legálmente tenke liu hosi  portaun portu Dili ka aeroportu maibé arguidu na’in-tolu fasilita kondenadu kazál  sidadaun Portugal  liuhusi tasi Betano, Munisípiu Manufahi hodi transfere kondenadu sira ba iha País seluk sem taka vistu no mós laiha koñesimentu husi autoridade Imigrasaun.

Hahalok arguidu na’in-tolu ne’ebé maka hanoin ho kondenadu Tiago Guerra ho Chang Foog- Fong Guerra, hodi fasilita malu hodi nune’e ema na’in  hira konsege duni halai sai husi territóriu ka halai husi justisa Timor nian no agora daudaun kondenadu nain-rua konsege too iha Portugal.

Arguidu na’in-tolu ho intensaun kria motivu hodi fasilita Tiago Guerra ho Chang Fong- Fong Guerra halai. Arguidu nain tolu sira hatene katak hahalok refere kontra lei mézmu hanesan ne’e sira la para no kontinua komete hodi rezulta avaliasaun sira hanesan temi ona iha leten.

Ho nune’e iha indísiu forte arguidu DDJ  komete krime favoresimentu pessoal p no p iha art 290 KP b. autór material Krime falsifikasaun agravda p no p iha art 304 KP c krime brankamentu kapitais p no p iha art 313 n. 1 al a) KP alteradu ho Lei n 17/2011 de 28 de dezembru.

 Arguidu  MTSF komete krime favoresimentu pessoal p no p iha art 290 KP b. ko autór ba Krime falsifikasaun agravadu p no p iha art 304 KP c. krime brankamentu kapitais p no p iha art 313 n. 1 al a) KP alteradu ho Lei n. 17/2011 de 28 de dezembru.

Arguidu  NESF komete krime favoresimentu pessoal p no piha art 290 KP b. autór material ba Krime falsifikasaun agravda p no p iha art 304 KP c Krime brankamentu kapitais p no p iha art 313 n. 1 al a) KP alteradu ho Lei n. 17/2011 de 28 de dezembru.

Hatán ba akuzasaun sira ne’e arguidu NESF  dehan faktu balun mak loos arguidu na’in-rua seluk  hili dalan nonook ka lakohi ko’alia perante iha julgamentu laran.

Iha julgamentu ne’e labele rona deklarasaun husi parte sira  tanba Ministériu Públiku  husu atu adia julgamentu ne’e ba loron seluk tanba parte  prokuradór titular sei iha ajenda  julgamentu ne’ebé tuir mai ho oras hanesan.

Tribunál deside adia fila-fali julgamentu ne’e ba iha  loron 30 setembru, tinan ne’e, iha  tuku 14:30 Otl, hodi kontinua rona arguidu NESF no sasin sira seluk.

Julgamentu ne’e prezide husi Juis koletivu, Maria Solana, Ana Paula Fonseca, Ivan  Suritai, Ministériu Públiku reprezenta husi Prokuradóra, Lidia Soares, no arguidu  sira hetan asisténsia legal  husi advogadu José Guterres ho Martina Costa.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here